Күзет: Қызмет көрсету көлемі ұлғайды
Атырау облысы бойынша меншікті тілші
Темір жол бойы мен әртүрлі объектілердегі жүктерді күзету «Әскерилендірілген темір жол күзеті» жауапкершілігі шектеулі серіктестігімен жүзеге асырылатыны белгілі. ӘТЖК-ның Атырау филиалы ұлттық компанияның салалық мекемелеріне күзет қызметін ұсынып келеді.
Жалпы Атырау филиалы «ҚТЖ – Жүк тасымалы» ЖШС «Батыс» филиалы қосалқы бөлімдерімен жасалған келісімшарттар негізінде тасымалданатын жүктердің сақталуын қамтамасыз ете отырып, нарық жағдайында жұмыс жасайды. Филиал қызметкерлері үш шекара аймағында, яғни Ақсарай (Ресей), Қарақалпақстан (Өзбек), Болашақ (Түрікменстан) мемлекеттер аралық түйіспелерінде қызмет атқаруда.
– Біздің негізгі міндетіміз – темір жол көлігімен тасымалданатын жүктерді күзетпен қамтамасыз ету. Осы жылдың 8 айында «Қазақстан темір жолы» ҰК» АҚ филиалдарына күзет қызметін көрсетуге орай 3 келісімшарт жасалды. Оның ішінде екеуі Атырау және Маңғыстау жол бөлімшелерімен, 1-і орталық магистральдық желі бөлімшесіне қарасты кәсіпорындарымен жасалған. 2023 жылғы келісімшартқа сәйкес 1 шілдеден бастап 8 пост қою арқылы 2 нысанның күзетілуі қамтамасыз етілді. Олар – Орал және Соколок өзендері арқылы өтетін көпірлерді күзету. Сондай-ақ жол бөлімшелерімен жасалған келісімге сәйкес жүктерді ілесе күзету қызметі көрсетілген. Биылғы жылдың 8 айында 15 236 пойыз бен 564 625 вагон ілеспе күзетпен қамтамасыз етілді. Өткен жылдың осы мерзімінде 16 802 пойыз, 628 576 вагон күзетілген-ді. Сегіз айда «ҚТЖ» ҰҚ» АҚ филиалдары бойынша 5952 күзет-сағаты жоспарланған болатын, ол өткен жылмен салыстырғанда 5952 сағатқа артық. Талданған мерзім қорытындылары бойынша орындау 5952 сағатты құрап, жоспарланған көлемді 103% орындадық. Біздің жұмысымыз нысан саны, сағат мөлшерімен өлшенетіндіктен, жүктерді ілесе күзету жоспары 1 743 495 сағат болса, нақты 1 998 073 сағатты құрап, жоспар 114,6% орындалды. Жоспардың артығымен орындалуына күзетілетін пойыздар мен вагондар санының артуы ықпал етті, – дейді филиал директоры Серік Ербөлеков.