Семейде болған алапат өртке өрт сөндіру пойызы тартылды
Абай облысы бойынша меншікті тілші
Апта ортасында Семей қаласындағы ірі сауда үйінде болған алапат өртті сөндіруге теміржолдың өрт сөндіру пойыздары да тартылды. Өрт ошағы магистраль бойынан шамамен небәрі 300 метр қашықтықта орын алғандықтан бұл қолайлы әрі қауіпті шара еді.
Семей ЖТ бөлімшесінің басшылығы төтеншеліктермен кеңесе келе жедел қимылдарға көшіп, аумағы шамамен 7 мың шаршы метрді қамтыған тілсіз жауды ауыздықтауға арнайы техникаларын жұмылдырып, өрт сөндіру пойызын іске қосты. Оқиға орнынан қозыкөш жердегі Семей станциясының қызметкерлері маневрлік пойыздар қозғалысы бойынша шешім қабылдып, қырағылықты арттырды. Әйтседе, өрт сөндірушілер, тәртіп сақшылары, ұлттық «Ұлан» сарбаздары және Семей ЖТ бөлімшесі теміржолшылары бірлесіп жүргізген алапат апатты жою оңай болмады, шамамен 12 сағат бойы жүргізілген іс-шаралардан соң қауіп толықтай сейіліп, өрт сөндірілді.
– Теміржол бойындағы нысандар мен инфрақұрылымдарға ешқандай залал келген жоқ. Жергілікті атқарушы билік пен Абай облыстық төтенше жағдайлар басқармасы біздің өрт сөндіру қызметіне алғыстарын білдіруде. Бұл оқиға теміржолшыларға қауіпсіздік шараларын нығайтып, кез-келген тосын жайтқа даяр болу керектігін ескертті, – дейді бұл орайда Семей ЖТ бөлімшесі қозғалыс қауіпсіздігі бөлімінің бастығы Расул Кәукенов.