Бейнеу станциясында қауіпсіздік шаралары күшейтілді

Теміржол – стратегиялық маңызды нысан. Тоғыз жолдың торабында түрлі адамдар кездеседі, олардың арасында ұры да, қары да болуы мүмкін. Міне, осынау алып салада қауіпсіздікті қамтамасыз ету міндетінің бір парасы желілік полицияға жүктелген.

Осы мақсатта теміржол бойында түрлі жедел-профилактикалық іс-шаралар жүргізетін көліктегі тәртіп сақшылары кезекті айлықты өткізуде. ҚР ІІМ нұсқамасына сәйкес ақпанның 5-9 аралығында «Бөгет», 7-9 аралығында «Қару» атты іс-шара ұйымдастырылып, сәтті аяқталды. 1 және 5 ақпан күндері басталған «Браконьер», «Қауіпсіз жол» атты іс-шаралар айдың соңына дейін жалғасады.  

Осыған орай Бейнеу станциясындағы желілік полиция бөлімшесінің қызметкерлері станцияға келіп-кететін барлық жолаушылар пойыздарында қырағылықты күшейткен. Пойыздағы жолаушылармен кездесіп, оларға есірткі заттарын сақтау, тасымалдаудың, тиым салынған аң мен бекіре тұқымдас балық өнімдерін заңсыз алып жүрудің, атыс қарулары, оқ-дәрілер, жарылғыш заттары мен жарылғыш құрылғылардың заңсыз жасалуына және айналымына байланысты қылмыстардың алдын алу және анықтау мақсатында қажетті жұмыстарын жүргізуде.  

Сонымен қатар ҚР аумағына заңсыз келетін азаматтарды анықтау бағытында да тиісті шараларды қолға алған.  

– Профилактикалық шаралар кезінде Бейнеу станциясындағы желілік полиция бөлімшесі қызметкерлері құқықбұзушылық пен қылмыстардың алдын алуға бағытталған бірқатар жұмыс атқарды. Станцияға аялдаған жолаушылар пойызының вагондарындағы жолаушылар, теміржолмен жолға шығып жатқан қонақтар мен тұрғындар, мектеп оқушылары, теміржолшылармен кездестік. Өз мақсатымызға сай түсінік беріп, тиісті заң талаптарын сақтамайтын әрекеттерге барудың салдары туралы ескерттік. Іс-шаралар барысында теміржолдың кез-келген жерінен кесіп өтушілер, заңсыз жүрген шетел азаматтары, белгіленбеген жерде сауда жасаушылар, мас күйде жүрген жолаушылар да анықталды,– дейді Бейнеу станциясындағы желілік полиция бөлімшесінің бастығы Насыр Дербісалиев.