Қараусыз мал – қауіпті
Маңғыстау облысы бойынша меншікті тілші
Қараусыз мал – қауіпті! Өйткені бұл төрт тұяқты жануар қанша момын болса, темір жолға одан келетін қатер соншалықты зиянды болып тұр. Маңғыстау темір жолында биылдың өзінде қырыққа жуық малды пойыз басып кеткен.
Пойыз қағып кеткен төрт түлікті санамағанда жолдағы малды баспау үшін машинистер қанша рет шұғыл тежеу беріп, тасымал процесінің құнды уақыты зая кеткен. Биылғы жыл басынан бері Маңғыстау магистральдық желі бөлімшесі бойынша темір жолда қараусыз жүрген 37 мал басу дерегі тіркелсе, соның тек 15 жағдайында ғана мал иесі анықталып, оларға 5 АЕК көлемінде айыппұл салынған.
– Темір жолда иесіз мал жүргені қауіпті екенін тұрғындар біле тұра әлі күнге малды бос жібереді. Осыған байланысты біз тұрғындармен және мал шаруашылығы иелерімен профилактикалық, түсіндіру жұмыстарын жүргізуді үнемі жалғастырамыз. Маңғыстау жол дистанциясы, Маңғыстау станциясындағы Желілік полиция бөлімінің қызметкерлерімен бірге өзіміз де ай сайын тұрғындармен кездесіп, түсіндіреміз. Пойыздың алдына шыққан бір малдың кесірінен жол қозғалысына қаншама зиян келеді. Тепловозға зақымдалып, артық жанармай шығындалуы, пойыздардың уақытынан кешігуі сияқты артық шығынға ұшырататын жағдайларға кездесуі мүмкін. Тіпті пойыз жолдан шығып кетуі де мүмкін. Осыны халық түсініп, темір жолға жақын ауылдарда мал шаруашылығымен айналысушылар тиісті шараларды қолдануын сұраймыз. Дегенмен нәтиже жоқ. Әлде айыппұл мөлшері аз немесе басқадай себеп, халықтың төрт түлікті темір жол маңына қараусыз жіберуі тыйылмай отыр, – дейді Маңғыстау магистральдық желі бөлімшесі директорының орынбасары Нұрболат Шалғабай.
Оның айтуынша, мал басылған жағдайда бағусыз малдың құлағында ен-таңбасы болмағандықтан иесін анықтау қиындық туғызады. Сондықтан малдың кімдікі екені анықталмай, иесімен профилактикалық жұмыстар жүргізуге мүмкіндік бола бермейді екен. Ал малға қарсы қоршау жайына келсек, Маңғыстау магистральдық желі бөлімшесінде басты жолдың ұзындығы 1115,5 км болса, қазір соның 687,05 км қоршалған. Биыл жоспар бойынша 107 км жол бойына қоршау жұмыстары жүргізілген.