Жіңішке станциясында қауіпсіздік рейді өтті

Жіңішке жүк станциясында қауіпсіздіктің алдын алу шаралары тұрақты өтеді. Бірнеше шет мемлекетке жүк жөнелту жұмыстарын ұйымдастырып отырған бірінші класты станцияда осы мақсатта тағы да рейд ұйымдастырылды.  

Ақтөбе қаласының іргесінде орналасқан Жіңішке станциясы аймақтағы алпауыт Ақтөбе ферроқорытпа және Ақтөбе хром қоспалары зауыттарымен тікелей байланыста жұмыс істейді. Өнімдерін Франция, Германия, Қытай, Ресей, АҚШ және Оңтүстік Корея елдеріне жөнелтеді. Жүк тиелген құрамдар сабылып жатқан станцияда қауіпсіздікті қамтамасыз ету оңай емес. Себебі станцияның екі жағында орналасқан елдімекен тұрғындары қауіпсіздік мәселесін жиі естен шығаратын   жайлар аз кездеспейді.  

«Ел экономикасының тікелей дамуына әсер ететін тасымалдау қызметі үшін қауіпсіздік мәселесі маңызды. Бұл жерден жүк вагондары үздіксіз өтіп жатыр, кедергі болмау керек. Қауіпсіздік – кедергісіз жұмыс кепілі.  

Жылжымалы құрамды шұғыл тоқтату көптеген шығындар әкеледі. Сондықтан Жіңішке, Қызғалдақ станциясында өтіп жатқан рейд – кедергісіз жұмысты күшейтуге бағытталған шара», – деді Жіңішке станциясы басшысының орынбасары А.Жұмабаев.

Айтуынша, шет мемлекеттермен жұмыс істейтін станцияда 60-тан аса кірме жол бар, жұмыстың бәрі халықаралық талапқа сай жүргізіледі.  

Станция басшысының орынбасары, инженер мен аға инспектордың желілік полиция қызметкерлерімен бірлескен рейдтік іс-шаралар Махамбет тұрғын үй алабында өтті. Темір жолға жақын аймақ тұрғындарына қауіпсіздікті сақтау, ластануға жол бермеу керектігі ескертіліп, стратегиялық аймақта тәртіп бұзбау жөнінде жаднамалар таратылды. Жол бойына қойылған ескерту белгілері де тексеріліп, профилактикалық әңгімелер өткізілді. Желілік полиция қызметкерлері үш адамға белгіленбеген жерден өтуге қатысты ескерту берді. Басшылық тарапынан қауіпсіздік туралы тұрғындарға кеңінен түсіндіріліп, әлеуметтік желіде ақпараттандыру жұмыстарын күшейтуді тапсырды.