Атырауда эвакуациялау жүргізілді
Атырау облысы бойынша меншікті тілші
Атырау жүк тасымалы және магистральдық желі бөлімшесі ғимаратында апатты жағдайлар бойынша Дүниежүзілік азаматтық қорғау күні қарсаңында азаматтық қорғау жоспарын орындау мақсатында «Барлық қызметкерлерді эвакуациялау» тақырыбында оқу-жаттығу өтті.
Одан бұрын өндірістік қауіпсіздік және экология мамандарымен оқу-жаттығу кезінде жарақаттанудың алдын алу шаралары жүргізілген болатын. Жаттығуға жүзге тарта қызметкерлер тартылды. Алматыдағы жағдайдан кейін жер сілкінісі бола қалған жағдайда бейқам отырмас үшін жаттығу қажеттігі ескерілді.
Соған сәйкес бұл жолы «Сейсмикалық дабыл» қағылып, барлық қызметкерлер ауладағы арнайы жиын орнына көшірілді. Содан кейін қызметкерлер еңбек орындарына қайта барды.
«Алматыдағы 6 балдық жер сілкінісі көп жайттың көзін ашты. Сондықтан ондаған адам ғимаратта қаннен қаперсіз отырғанда жер сілкінсе не басқа бір төтенше жағдай орын алса, қызметкерлер қалай әрекет етуі керек, мұндай жағдай кезінде өздерінің және айналасындағылардың қауіпсіздігін сақтау үшін не істеу керек? Міне, жаттығу барысында осы мәселелер түсіндірілді. Әрине оқу-жаттығу жұмыстары жиірек өтіп тұрғаны абзал. Осы мақсатта өткен шараға барлық қызметкерлер қатысты. Бұл адам өмірі мен қауіпсіздік үшін қажетті жаттығу болды», – дейді Атырау қосалқы бөлімінің азаматтық қорғаныс және төтенше жағдайлар жөніндегі инженері Нұрлан Сұлтанғалиев.
