Теміржол бойында балалардың ойнауы тыйылмай тұр

Теміржолшылар үшін пойыздардың қозғалыс қауіпсіздігін сақтау – ең маңызды міндет. Қызылорда магистральдық желі бөлімшесінде өткен дөңгелек үстелде Түркістан-Сексеуіл, Сексеуіл-Қоскөл станциялары арасында қауіпсіздікті қамтамасыз ету сөз болды.

Қызылорда магистральдық желі бөлімшесі бойынша орын алған қауіпсіздікке кереғар жағдайларды сараптап, бөгде адамдардың, иесіз малдың пойызға басылуы секілді келеңсіз жайттардың алдын алу үшін қандай амал жасау керек, т.т. мәселелер дөңгелек үстел басында талқыланып, ұсыныс-пікірлер айтылды, келісімдер жасалды.

Жиынға Қызылорда магистральдық желі бөлімшесінің бас инженері Берік Бекжановтың басшылығымен бөлімшенің қауіпсіздік қызметінің басшысы Бақытбек Сейсенов, Қызылорда бөлімшесі бойынша аймақтық бас ревизор Алмат Молдашев, Көліктік бақылау комитетінің бөлім басшысы Еркін Тайғашев, ЖІІб полиция майоры Бақыт Айғали, аға лейтенант Серік Асанов, аймақтағы  локомотив, жол, электрмен жабдықтау және белгі беру және байланыс дистанцияларының бас инженерлері қатысты.    

– «ҚТЖ» ҰК» Магистральдық желі дирекциясы бойынша өткен жылы 12 адам, 650 мал басу оқиғасы орын алған, пойыз машинистері 95 рет шұғыл тежегіш қолданған. Ал біздің бөлімше бойынша белгіленбеген жерден өту салдарынан 3 адам басу, 28 мәрте мал басу орын алған, одан бөлек иесіз малдың жолға шығуынан тепловоз машинистері тағы 8 рет жедел тежегіш басып, тоқтауға мәжбүр болған. Өкінішке орай, мұндай жайттар биылғы жылы да қайталануда, – деді бөлімшенің бас инженері Берік Бекжанов жиынды ашып сөйлеген сөзінде.

Аймақтық бас ревизор Алмат Молдашев, жол бойындағы қайғылы жағдайлар жиі орын алатын жерлерді атап, сол маңайларды түгел тікенек сымдармен қоршау керектігіне назар аударды. Қаншама рет мектеп, оқу орындарында теміржолдың қауіпті аймақ екендігін түсіндіру жұмыстары жүргізілгенмен, бала-шаға жол бойына келіп ойнаудан тыйылмай отыр, ал жолдан өтемін деп тікенек сымға үстіндегі киімін ілдіріп, жыртып алғанын көрген ата-ана баласына бақылауды күшейтетін болар деген ойын жеткізді. Жол дистанциясының бас инженері Ақылбек Әбілдаев станция маңында теміржолды қоршау тікенек сыммен емес, тек арнайы темір қоршаулармен жүргізілетініне тоқталды. Бірақ темір қоршаудың орнатылуына көп уақыт пен қаражат жұмсалатыны сөз болып,  адам өмірінің маңыздылығын ескере отырып жол бойын тікенек сыммен қоршау тиімді де үнемді деген де пікірлер айтылды. Сонымен қатар жолды күрделі жөндеуден өткізуші мердігер компанияға жол бойын қоршау жұмысын да қоса жасауды міндеттеу қажеттігі сөз болды.    

Машинистің жедел тежегіш қолдану кезіндегі әрекетінің бейнетаспаға жазылуын міндеттеу жайын ортаға салған ЖІІб полициясының аға лейтенанты Серік Асанов, кейде мал басылды деп дабыл қағылғанмен, оқиға орнына жедел топ барғанда пойызға басылған малдың болмауы сирек те болса кездесетінін, қауіпсіздікке қатысты толтырылатын хаттамалар белгілі уақыт ішінде қағидаларға сай өткізіліп, тергеу амалдары жергілікті уәкілетті құқық органдарымен жүргізілетіндігін жеткізді.  

Тепловоз машинистерінің сапар бойынша әрекеті таспада бедерленетіні, тепловоздарды бейнекамералармен жабдықтау жұмысы жүргізіліп жатқанын айтқан депоның бас инженері міндетін атқарушы Жанатбек Жүнісов машинистермен өткізілетін күнделікті техникалық сабақтарға қатысып, қауіпсіздікке қатысты мәселелерді олармен де өткізуге қарсы емесін білдірді.

Жалпы, пойызға басылған мал иесін тауып, әкімшілік жауапқа тарту, өткелдерде биыл жүргізілген 25 рейд, 1126 адам қатысқан 34 рет жиын, оқу орындарында 4010 оқушы қатыстырылған тағы 23 түсіндіру жиынын өткізу,  ҚР Кодексінің 559-бабына сәйкес 1431 адамға ескерту парақшаларын тарату,  әлеуметтік желіге қауіпсіздік бейнероликтерін жариялау, 11 мәрте жергілікті әкімдіктерге хат жолдау, өткелдерге бейнекамералар орнату, т.т. шаралар қауіпсіздікке төнген қауіпті сейілткенімен, нәтижесі көңіл көншітерлік деңгейде емес деген қорытынды жасалды. Жиында айтылған пікір, ұсыныстар хатталып,  қатысушылар ортақ мәселелердің шешімін бірге қарастыруға уағдаласты. Ал шешім біреу ғана – ол қауіпсіздікті қамтамасыз ету.