Ақтөбе теміржолында 90 азамат әкімшілік жауапкершілікке тартылды
Ақтөбе облысы бойынша меншікті тілші
Темір жолда тыйым салынған заттарды тасымалдаудың жауапкершілігі қашан да жоғары. Қару-жарақ, жарылғыш заттар мен жарылғыш құрылғыларды, газбен атылатын қаруларды, оқ-дәрілерді алып өтуге жол жоқ.
Ақтөбелік көліктегі тәртіп сақшылары теміржолшылармен бірлесіп «Құқықтық тәртіп» жедел-алдын алу іс-шарасын өткізді. Шара кезінде қылмыстың алдын алу, қоғамдық қауіпсіздікті қамтамасыз ету жұмыстарына басымдық беріліп, жолаушылар мен тұрғындарға жауапкершілік түсіндірілді.
«Жедел алдын алу шаралары кезінде 90 азамат әкімшілік жауапкершілікке тартылды. Оның ішінде қоғамдық орынды ластаған және алкогольдік ішімдік ішкен, көші-қон заңнамасын бұзған және ұсақ-түйек бұзақылық үшін жауапқа тартылғандар қатары көп. Түрлі әкімшілік құқық бұзушылық жасаған 69 адамның ісі әкімшілік сотқа жолданды», – деп хабарлайды Ақтөбе ЖПБ баспасөз қызметі.
Сонымен қатар тәртіп сақшылары тыйым салынған заттардың тасымалы үшін көзделген жаза түрлерінен де хабардар етті. ӘҚБТ Кодекстің 482-бабы «Жеке және заңды тұлғалардың қаруды заңсыз иеленуі, беруі, өткізуі, сақтауы, алып жүруi, тасымалы – 20 АЕК айыппұл; ӘҚБТ Кодекстің 484-бабы «Азаматтық және қызметтік қару айналымы қағидаларын бұзу» – 10 АЕК айыппұл; ҚР ҚК 287-бабына сәйкес «Қаруды, оқ-дәрілерді, жарылғыш заттарды және жарылыс құрылғыларын заңсыз иемдену, беру, өткізу, сақтау, тасымалдау немесе алып жүру» – мүлкі тәркіленіп немесе 5 000 АЕК айыппұл салуға не сол мөлшерде түзеу жұмыстарына немесе 5 жылға дейiн бас бостандығын шектеуге яки бас бостандығынан айыруға жаза кесілетінін жеткізді.