Ақау тапқан вагон қараушы марапатқа ұсынылды
«Қазақстан теміржолшысы» газетінің тілшісі
Астана вагон пайдалану депосының Қырқыншы станциясындағы, яғни техникалық қызмет көрсету қосынының вагон қараушысы Марат Мезенбеков вагонның бүйір рамасынан күрделі ақау тауып, апаттың алдын алды.
Тәжірибелі вагон қараушы ақауды вагон шаруашылығында бүйір рамасы бойынша ұйымдастырылған төрт айлық кезінде тауып отыр. Ол түнгі ауысымдағы жұмысы кезінде бүйір рамасынан тереңдігі 2 мм, радиусы R-55 болатын сызатты анықтап, тексере келе қозғалыс қауіпсіздігіне нұқсан келтіретін қауіпті ақау деген қорытынды жасалған. Қырағылығымен қауіптің алдын алған Марат Мезенбековті басшылық «Қозғалыс қауіпсіздігі үшін» төсбелгісіне ұсынды.
1973 жылы Петропавл өңірінде дүниеге келген Марат теміржолда 2006 жылдан бері еңбек етеді. 2014 жылдан бастап вагон қараушы. Тәжірибеден бөлек түрлі біліктілігін көтеріп, курстарда дәріс алып, бүгінде 6-разрядтағы вагон қараушы-жөндеуші дәрежесіне ие. Соған қарамастан дистанцияда өтетін техникалық сабақтарға қалмай қатысып, білімін жетілдіріп отырады.
– Вагонның жалпы сыртқы жағдайын көргеннен кейін-ақ ақау болу қаупі бар-жоғын бағамдай бастайсың. Ескілеу болса, ақау шығу қаупі басым. Сондықтан мұндай кезде екі есе мұқият боласың. Түнгі уақытта фонарь түсіріп қарағанда көзге көрінер-көрінбес жарықты анықтау оңай емес. Жалпы осы жұмысқа келгелі 10 жылдың ішінде 3-4 ақау таптым. Бұрын бұлай жария қылмайтын. Қазір ынталандырып, еңбегіміз жақсы бағаланатын болды. Бір ауысымда 12 вагон қараушы шығамыз, әр вагонды 4 адам қарайды. Біздің кәсібімізде ең бастысы қырағылық, мұқияттылық, тиянақтылық, көздің жақсы көруі мен құлақтың дұрыс естуі де маңызды, – дейді ақау тапқан жігіт.