Теміржол станциясында рейд жүрді

Теміржол – аса қауіпті стратегиялық аймақ. Мұндағы қозғалыс пен жүріп-тұрудың өз ережесі мен тәртібі бар. Оған бағыну – шарт. Ал оны бұзсаң,  жауапкершілікке тартыласың.  

Теміржолға жақын орналасқан елдімекеннің әрбір тұрғыны осындай тұжырыммен таныс. Дегенмен, оны екінің бірі сақтай бермейді. Жіңішке станциясы басшысының орынбасары А.Жұмабаев бастаған бір топ теміржолшылар кезекті рейдке шығып, тағы да осы тақырыпқа қатысты дабыл қақты. Қауіпсіздікке нұқсан келтіретін жазатайым оқиғалардың алдын алу мақсатында теміржол көлігіндегі ереже мен тәртіп жайын тағы бір ескерткен теміржолшылар станция айналасындағы елді мекендер мен сол маңдағы мектептерді аралады.    

Жіңішке станциясы басшысының орынбасары А.Жұмабаев қауіпсіздіктің сақталуы күнде сұралса да адамдар өз өмірлерін қатерге тігіп теміржолды кез келген жерден кесіп өтуін тоқтатпай отырғанын жеткізді.    

– Төрт түлік малдың да жолға шығып, қоршауларды бұзып кету дерегі азаймай тұр. Оқыс оқиғалардан жолаушылар және жүк пойыздарының кестесі бұзылып, локомотивтерге шығын келеді. Біздің Жіңішкедей жүк станциясы үшін қауіпсіздіктің сақталуы аса маңызды. Айнала толы өндіріс орындары, – дейді А.Жұмабаев.

Рейд барысында оқушылар мен жасөспірімдерге қылмыстардың алдын алу және теміржолда жүру ережесі жазылған жадынамалар таратылып, балалардың жарақат алуы мен жазатайым оқиғалардың алдын алу, жолаушылар пойыздарының әйнектерін сындыру сияқты бұзақылық оқиғалар салдары, ол үшін жауапкершілік пен айыппұл қарастырылатыны түсіндірілді.