Қайықпен барып қауіптің алдын алды
Атырау облысы бойынша меншікті тілші
Құлсары қаласын басқан су темір жолдағы электр желісіне де қауіп туғызды. Көп күн суда тұрып түбі әбден босаған бағаналар тасқын су екпінінен қозғалып, ал ол электр сымдарының үзілуіне әкеліп соқты.
Атырау электрмен жабдықтау дистанциясына қарасты Құлсары аудандық электр торабының бригадасы апат орын алған Мақат-Құлсары учаскесінің 1249-шы шақырымына жедел жетіп, апатты қалпына келтіру жұмыстарына кірісті.
«Аудандық электр торабына қарасты электр желісінің үзілуі пойыздардың қозғалыс қауіпсіздігіне әсер етеді, өйткені бағдаршамдар, бұрмалар, т.б. электр қуатына тәуелді. Сондықтан аудандық торап жетекшісі Еркін Нағиев бастаған бригада желіні қалпына келтіру мақсатында Жем өзенінің сағасы саналатын Сарқырауық өзегі маңына келіп, әуелі жағдаймен танысты. Бағаналар тұрған жер суда тұр, сондықтан қайықпен барып, әуелі зақымданған ескі желіні ток көзінен айырып кесіп тастады. Сосын орнына жаңа желі тартып жалғады. Айта кетерлігі, аймақта төтенше жағдай жарияланғаны себепті Атырау магистральдық желі бөлімшесі шұғыл түрде біздің аудандық торапқа бір резеңке қайық пен үш қорғаныш құралдарын (ОЗК), электр сымдарын алып берген болатын. Соның арқасында бригадаға жұмыс жасау тиімді болды. Қорғаныш құралдарымен қаруланған электромеханик, электромонтерлер апат орнында бағаналарды бекітіп, электр желісін қалпына келтірді», – дейді ЭЧ-4 бас инженері Абай Есқалиев.
