Жолаушылар эвакуацияланды
Ақтөбе облысы бойынша меншікті тілші
Ақтөбе теміржол вокзалының екінші қабатынан өрт шықты. Түтін жайлаған ғимарат ішінде қалған жолаушылар эвакуацияланды.
«ҚТЖ» ҰК» АҚ магистральдық желі бөлімшесіне қарасты №39 өрт сөндіру пойызы мен облыстық ТЖД бірлесіп Ақтөбе теміржол вокзалында өткен өртке қарсы оқу-жаттығу шарасы осылай басталды. «Вокзал ғимаратындағы өртті сөндіру және адамдарды көшіру» тақырыбында өрт-тактикалық оқу-жаттығуының сценариі бойынша екінші қабаттан өрт шығып, ғимарат ішін түтін басты. Есінен танып құлаған адамға дер кезінде көмек көрсетіліп, медицина қызметкерлеріне табысталды. Өрттен қорқып, ғимарат төбесіне шығып кеткен адамдар автосаты арқылы төмен түсірілді.
Жауапты мамандар нысаннан шыққан өрттің алдын алу және өртті тез арада сөндіріп, ғимараттың ішінен қызметкерлер мен жолаушыларды қауіпсіз жерге жедел көшіруді ұйымдастыру, өрт кезінде дұрыс шешім қабылдауды пысықтау жұмыстарын сауатты атқарып, төтенше жағдайға сақадай сай дайындықтарын көрсетті.
«Жаттығу ең алдымен іс-қимылдың жедел және шапшаң, сауатты әрекет етіп, өрттің алдын алу бағытындағы жұмыстарды нығайтуға бағытталды. Сырттан қарағанда жаттығу емес, шынайы оқиға сынды көрінген іс-шара жоғары деңгейде өтті деп қорытындыланды», – деді Ақтөбедегі өрт сөндіру пойызының басшысы Бауыржан Файзоллаұлы.
Айта кетейік, оқу-жаттығуға өрт сөндіру пойызы, екі өрт сөндіру техникасы, полиция қызметкерлері мен дәрігерлер қатысты.
