Жазатайым оқиғасыз жұмыс істеген Түрксіб станциясы алғысқа ие болды
![](https://rail-news.kz/uploads/2024/08/26/IsjecD3JY4j79Glv9fIOiOcHZ7MFtAxtkkXxxhNX.jpg)
![](https://rail-news.kz/img/noimg.png)
"Қазақстан теміржолшысы" газетінің Жамбыл облысындағы меншікті тілшісі
Ұзақ жылдар бойы еңбек қауіпсіздігін сақтауда жазатайым оқиғасыз жұмыс істеген Түрксіб станциясына Жамбыл жүк тасымалы бөлімшесі директорының «Алғыс хаты» тапсырылды. Қырғыз темір жолымен шектесетін халықаралық түйісу станциясының еңбек қорғауда өз тәжірибесі бар.
Бұрынғы Луговой – бүгінде Түрксіб атауын иемденген станция көрші елмен түйісу пункті болғанымен, атқаратын қызметіне қарай учаскелік станцияға жатады. Қазіргі уақытта көршілес елдердегі жүк пойыздарына шекаралық бақылау жүргізілмейді.
– Бірінші класты станция деген статусымыз бар. Жүргізіліп жатқан жұмыс көлемі бойынша учаскелікке де жатамыз. Пойыздар қозғалысы жиі, жүк тасымалының қарқыны да жаман емес. Соңғы бірнеше жыл өндірісте апатты жағдай, жарақат алу сынды жазатайым оқиғалар орын алған жоқ, яғни еңбек қауіпсіздігін сақтауда жетістігіміз де аз емес. Бұл тұрғыда басты ұстанымымыз – станцияда еңбек ететін әрбір теміржолшыдан ең алдымен өз жеке басының қауіпсіздігін қамтамасыз етуі қатаң талап етіледі. Еңбек қауіпсіздігін сақтаудың ережесіне сәйкес келмейтін жағдай қатаң сынға алынады. Бүгінгі күні штатта 88 адам болса, оның 79-ы ауысыммен жұмыс істейді. Ауысым арасында теміржолшылардың жұмысы медициналық тексеруден өтуден басталады. Жұмысшы-қызметкерлерге арнайы киімді киіп жүру міндеттелген, – дейді Түрксіб станциясының бастығы Тимур Қуанышұлы.
![](https://rail-news.kz/uploads/attachments/photo-2024-07-22-16-37-45-66cc4cd9d7eba.jpg)
Өндірістегі жарақаттардың және жазатайым оқиғалардың алдын алу – станцияда күн сайын өтетін техникалық сабақтың да басты тақырыбы. Дәрісте еңбек қауіпсіздігін сақтаудың ережелері мен талаптары әрбір күн сайын қайталанып, осы бағытта шығарылған қаулылар таныстырылып отырады. Станция бастығы техсабақтардың формальды сипат алмай, өз дәрежесінде өтуін қадағалап отырады. Бұл да еңбек қорғау мен қауіпсіздіктің сақталуына ықпал етері сөзсіз.
Сонымен қатар теміржолшылар арнайы жоспарға сәйкес, кезең-кезеңімен еңбекті қорғау саласындағы біліктілікті арттыру курстарына жіберіліп тұрады. Арнайы құрал-жабдық, жұмыс киімдерімен уақытылы қамтамасыз етіліп тұрады.
Станцияда қозғалыс қауіпсіздігін сақтауға үлес қосқан қызметкерлерді марапатқа ұсынып, еңбегін дәріптеу ісі жақсы жолға қойылған. Олардың арасында «Қозғалыс қауіпсіздігі үшін», «Үздік маман», т.т. төсбелгілерінің иегерлері аз емес. Бөлімше басшылығы еңбек қауіпсіздігін сақтауда жазатайым оқиғасыз жұмыс істеген станция басқа салалық құрылымдармен өзара тәжірибе алмасуы керек деп санайды.