Теміржолшылар көктемгі су тасқынының алдын алуға атсалысты
Абай облысы бойынша меншікті тілші
Биылғы көктемгі су тасқыны еліміздің бірқатар өңірімен бірге семейліктерді де әбігерге салды. Аягөз, Жарма өңіріндегі теміржолға да қауіп төнген. Осыған орай теміржолшылар алдағы көктемде орын алуы ықтимал қар суынан болатын тасқын қатеріне даярлық жұмыстарын қазірден бастады.
Өңірдегі көктемгі су тасқынына дайындық деңгейін тексеру және қажетті шараларды бақылау мақсатында бірқатар іс шаралар ұйымдастырылуда. Жергілікті атқарушы билік өкілдерімен бірлескен жұмыстар алдағы көктемге дейін жүргізілмек. Бірінші кезектегі міндет станциялар басшыларына жүктелуде. Олар әкімдіктермен бірлесе жұмыс жүргізіп, аумақтағы су қоймаларындағы су қорының жинақталуын назарда ұстап, қар шығару сенбіліктерін ұйымдастыруы тиіс.
Сонымен қатар су тасқыны қаупіне байланысты су арналарын тазалау, қорғаныс бөгеттерін нығайту және қажетті техникаларды әзірлеу секілді алдын алу шаралары қазірдің өзінде пысықталуда. Бұл жұмыстардың барлығы аймақ басшысының тікелей бақылауына алынып отыр.
– Жалпы, өңірде төтенше жағдайлардың алдын алуға бағытталған шараларға теміржолшылар да атсалысатын болады. Осы орайда НЖС-6 бөлімшесіне тиесілі 440 көпір, 368 құбыр мен 181 шақырым арық, 1216 км су арналарын қардан тазарту жұмыстары тұрақты жүргізіледі. Қызылсу қаупі аяқ астынан. Сол себепті де қажетті жағдай туындаса, жұмылдыру үшін арнайы техникалар да даяр, – дейді Семей магистральдық желі бөлімшесі бойынша азаматтық қорғаныс бөлімінің инженер-технологы Еркін Спанов.
Осылайша қыс мезгіліндегі атқарылған жұмыстар көктемгі кезеңде су тасқынының қаупін барынша төмендетуге бағытталмақ.
Айта кетерлігі, Абай облысындағы көктемгі су тасқынына даярлық мәселесі ҚР Үкіметі аппаратының Өңірлік даму және бақылау бөлімінің назарына алынған. Соның аясында қазіргі күннен бастап атқарылған аймақтағы барлық шаралардың сапасы бағаланатын болады. Басты міндет – мекемелерге су тасқынына қарсы іс-шараларды уақытылы жүргізіп, көктемде төнер қауіптің алдын алу болып отыр.
