Малын жол бойына қараусыз жіберетіндерге айыппұл жоғары
Ақтөбе облысы бойынша меншікті тілші
Машинистер Ақтөбе станциясы аумағында бір жылда 61 рет жедел тежегіш қолдануға мәжбүр болды. Оның 19 дерегі бойынша тепловоз алдынан адам шыққан.
Теміржол бойының тәртіп сақшылары стратегиялық аймақтағы қауіпсіздікке алаңдаулы. Себебі темір жолға мал мен жанның шығып кету оқиғалары азаймай тұр. «Профилактика» жылы деп жарияланған 2025 жылы темір жол бойындағы қауіпсіздік шаралары күшейтіледі деп хабарлады Көліктегі полиция департаментінің өкілдері.
Өткен жылы жылжымалы құрамдар 61 рет жедел тежегіш қолданып, оның 19 дерегі адамдардың темір жолды белгіленбеген жерден кесіп өтуі бойынша, ал 42 жағдайда қозғалысқа мал кедергі болған. Адамдармен түсіндіру жұмыстары жүргізіліп, мал иелеріне ескертулер беріліп, қайталанған 7 оқиға бойынша айыппұл салынған.
– Биыл қаңтарда «Жіңішке-Қызғалдақ» станциясы аралығында жүк пойызы жолға шыққан жылқыны басып кеткендігі туралы хабар түсті. Өлген малда белгі болмағандықтан, иесі анықталмады, мұндай оқиғалар, өкінішке орай, аз емес, сырғасы жоқ малдың иесін анықтау қиынға түседі, – деді Ақтөбе станциясындағы желілік полиция бөлімінен Роза Төлегенқызы.
Айтуынша, жол бойына шыққан иесіз мал уақытша ұстау қорасына кіргізіледі. Малын жол бойына қараусыз жібергендерге 110 мың 760 теңге айыппұл салу қарастырылған. Яғни, айыппұл да өскен.