Алғашқы көмек – маңызды

Бүгінде «ҚТЖ» ҰК» АҚ – Магистральдық желі бөлімшесі дирекциясы мен филиалдарында өндірістік жарақаттанудың алдын алу бойынша қауіпсіздік шараларын күшейтуге қатысты оқыту сабақтары жүріп жатыр. Қыркүйек айының соңына дейін жалғасатын оқу 300 қызметкерді қамтиды деп күтілуде.

«Магистральдық желі дирекциясы мен оның ел өңірлеріндегі филиалдары еңбеккерлерінің жұмысы тікелей өндіріспен, пойыздар қозғалысымен байланысты. Ауыр жұмыс, экологиялық жағдай, тағы басқа факторлар адамның денсаулығына кері әсер етіп жататыны жасырын емес. Кейде жұмыс орнында жұмысшының денсаулығы нашарлаған немесе өндіріс орнында жазатайым оқиға болған жағдайлар кездесіп жатады. Мұндайда не істеу керек? Әрине, жанындағы жұмысшылар шұғыл медициналық көмек келгенге дейін әлгі адамның денсаулығын және өмірін сақтап қалу үшін дәрігерге дейінгі алғашқы көмек көрсете білуі керек. Міне, қазір өтіп жатқан оқытудың басты мақсаты – осы.

Бұл оқытулардан алған білім мен дағдылар күнделікті өмірде де кез келген жағдайда пайдасын тигізетінін сөзсіз», – дейді Магистральдық желі дирекциясының Қауіпсіздік және еңбек қорғау, өнеркәсіптік қауіпсіздік және экология департаментінің бас менеджері Баян Смайлова.  

Белгілі болғаны, Магистральдық желі дирекциясы мен оның ел өңірлеріндегі филиалдары қызметкерлерін адам өмірін құтқару және төтенше жағдайлар кезіндегі асқынулардың алдын алу үшін дәрігерге дейінгі алғашқы көмек көрсету әдістеріне оқытуды «Қазақстан Республикасының Қызыл Ай қоғамы» қоғамдық бірлестігінің сертификатталған жаттықтырушылары және ҚР Төтенше жағдайлар министрлігі жанындағы «Апаттар медицинасы орталығы» мемлекеттік мекемесінің парамедиктерімен өткізуде екен.  

Оқу дәрісі бірнеше тақырыптарды қарастырады. Атап айтқанда, жарақат алғанда немесе денесін зақымдағанда, қан кеткенде, әртүрлі дәрежедегі жараларға, күйіктерге, дене мүшелерін үсітіп алса, құрысып тырысып қалса, жәндіктердің шағып алса, уланса, күн тисе, тыныс алуы тоқтаса, есін жоғалтса және инсульт алса көмек көрсету. Оқыту барысында қатысушылар келесі дағдыларды: зардап шеккен қызметкердің өмірі мен денсаулығына қауіп төндіретін денсаулық жағдайындағы факторларды анықтауды; жәбірленушінің жағдайын дұрыс тексеруді; алынған жарақаттың/зақымданудың сипатын көзбен бағалауды; зардап шеккен адамға алғашқы медициналық көмек көрсету үшін тез және дұрыс шешім қабылдай білуді; сондай-ақ, жәбірленушіге алғашқы дәрігерге дейінгі көмекті, оның ішінде жүрек-өкпе реанимациясын көрсетуді; автоматты сыртқы дефибрилляторды қолдануды үйренетін болады.