Теміржолшылар мен құтқарушылар төтенше жағдайға дайындықтарын пысықтады
Ақтөбе облысы бойынша меншікті тілші
Ақтөбенің Жіңішке станциясында «Бейбіт және соғыс уақытында төтенше жағдайлар туындаған немесе қаупі төнгенде басқару органдарының, апаттық-құтқару қызметтері мен азаматтық қорғаныс құрылымдарының іс-әрекеттері» тақырыбы аясында ұйымдастырылды.
Кешенді жаттығуға «Қазақстан темір жолы» ҰК» АҚ-ның «Ақтөбе магистральдық желі бөлімшесі» және «Жүк тасымалы» АҚ филиалы – «Ақтөбе ЖТ бөлімшесі» қызметкерлері, азаматтық қорғау құрылымдары мен өрт сөндіру пойызының мамандары қатысты.
Жаттығуды Ақтөбе қаласы әкімінің орынбасары мен облыстық төтенше жағдайлар департаментінің азаматтық қорғаныс басқармасының бастығы басқарды. Жергілікті локомотив және вагон деполары, жол және байланыс дистанциялары, өрт сөндіру пойызының мамандары, сондай-ақ станция қызметкерлері қатысқан жаттығу барысында азаматтық қорғау қызметтері мен құрылымдарының төтенше жағдай кезіндегі іс-қимылдары пысықталды. Негізгі мақсат – жеке құрамның кәсіби дағдыларын жетілдіру, түрлі сипаттағы төтенше жағдайларға дайындық деңгейін арттыру болды.
Жаттығу сценарийі бойынша күкірт қышқылы тиелген вагонның темір жолдан шығып кетуі нәтижесінде апаттық жағдай туындады. Салдарынан екі адам жарақат алды. Олар дереу қауіпті аймақтан шығарылып, апаттық медицина қызметіне тапсырылды. Ал вагон цистернасындағы 6 мм жарықтан төгілген күкірт қышқылының таралу аймағы қоршалып, арнайы су көбігімен залалсыздандырылды.
Іс-шара соңында жеке құрам сапқа тұрғызылып, оқу-жаттығудың нәтижесі қорытындыланды. Иса Байтұрсынов қатысушылардың жұмысын «қанағаттанарлық» деп бағалап, әлі де жетілдіруді қажет ететін бағыттарды атап өтті.
