Атырауда биыл 417 рет шұғыл тежеу қолданылған
Атырау облысы бойынша меншікті тілші
Қыркүйектің 1-30 аралығында «Шара қабылда – өміріңді сақта» айлығы жарияланды. Осы айлық кезінде алынған барлық шараларға қарамастан жағдай қиын дейді теміржолшылар.
Темір жолдағы белгіленбеген жерден өту, жол бойында жайбарақат жүру, көлік иелері өткелдерден өтуде қауіпсіздікті сақтамау, пойыз жақындап қалса да мал иелерінің малды жолдан тезірек әрі өткізуге тырысуы (ол үшін әкімшілік айыппұл салынатыны ескертілсе де) тыйылмай отыр. Жыл басынан бері еліміздегі темір жолдарда адам басудың 45 жағдайы тіркеліп, 26 адам қайтыс болған, 21 адам мертіккен, оның ішінде балалар да бар. Осы жылдың 8 айында Атырау жүк тасымалы бөлімшесіне қарасты локомотив шаруашылығының машинистері адам мен мал басудан сақтанып 417 шұғыл тежеу жасауға мәжбүр болған. Бұл темір жолға үлкен зиян, шығын келтіретін құбылыс екені аян.
Сондай-ақ Атырау жүк тасымалы бөлімшесінің қозғалыс қауіпсіздігін сақтау қызметінің бастығы Фарида Қазжанованың мәліметінше, бөлімше бойынша «Әскерилендірілген теміржол күзеті» және Атырау станциясы желілік полиция бөлімімен бірге бөгде адамдардың теміржол бойында жүруін қадағалау бойынша 287 бірлескен рейд жүргізілген. Нәтижесінде белгіленбеген орында жүргені үшін 87 адамға, ал станциялық жолға малды бақылаусыз жібергені үшін 7 адамға ескерту беріліп, әкімшілік хаттама толтырылған. Әрине, мұның бәрі темір жолда қозғалыс қауіпсіздігін сақтау және адам өмірін оқыс жағдайдан, қауіптен сақтау үшін жасалап жатқан шаралар.