Ақтөбе телімінде он айда 3 оқыс оқиға тіркелді
Ақтөбе облысы бойынша меншікті тілші
Биылғы жылдың он айында Ақтөбе телімінде 3 оқыс оқиға тіркеліп, бір адам мерт болды. Қараусыз малдың жолға шығуына байланысты жылжымалы құрам 27 рет шұғыл тоқтатылған.
Қозғалыс қауіпсіздігі департаментінің Ақтөбе телімі бойынша бас ревизоры Еркінбек Елғонды 10 айдың жұмысын қорытындылап, осындай фактілерді жария етті. Теміржол көлігінің тұрақты әрі қауіпсіз жұмысын қамтамасыз ету үшін түрлі тәуекелдер мен сыртқы факторларды талдаудың маңыздылығы айтылды. Қозғалыс қауіпсіздігіне әсер ететін негізгі қауіп-қатерлер аталды. Олардың қатарында: темір жол маңында қараусыз жүрген мал; азаматтардың рұқсат етілмеген жерден өтуі; көлік жүргізушілерінің теміржол өткелдеріндегі ережені бұзуы; ауа райының күрт өзгеруі; бөгде адамдардың жол бойына бөтен заттар қоюы; теміржол элементтерін ұрлау және өрт жағдайлары бар. Мұндай оқиғалардың ең ауыр салдары – адам өлімі мен жарақат алу.
«Қарапайым ережені сақтау үлкен қауіптің алдын алады. Теміржолшылар халықты ақпараттандыру, түсіндіру жұмыстарын тұрақты жүргізеді. Бірақ тұрғындардың қабылдауы әртүрлі. Оқыс оқиғалар салдарынан қайғылы жағдайлар тіркелуде», – деді Еркінбек Елғонды.
Теміржолшылар үшін қараусыз малдың теміржолға шығуы – басты қауіптердің бірі. Жыл басынан бері қараусыз малдың жолға шығуына байланысты 27 шұғыл тежеу тіркелген. Оның ішінде 24 жағдайда малмен соқтығысу орын алған, оның 19-ы жолаушылар пойыздарымен болған. Мұндай соқтығыстар теміржол техникасына зиян келтірумен қатар, адам өміріне де қауіп төндіреді. Бұл мәселені азайту үшін Ақтөбе телімінің 20-100 км аралығында теміржол бойына қатты қоршаулар орнатады. Биылғы он айда 7000- нан астам тұрғын мал айдау және бағу ережелерімен таныстырылған.