Қауіпсіздік айлығы: теміржол бойында профилактикалық шаралар жүріп жатыр
"Қазақстан теміржолшысы" газетінің Жамбыл облысындағы меншікті тілшісі
ҚТЖ-да 14 қазан мен 14 қараша аралығында темір жолдағы тасымалдау процесінің қауіпсіздігін және тасымалданатын жүктердің сақталуын күшейту мақсатында арнайы айлық жарияланып отыр.
Осыған байланысты тиісті құрылымдар қауіп-қатердің алдын алу мақсатында күшейтілген жұмыс режиміне көшті. Әрине, қозғалыс қауіпсіздігіне темір жолдың барлық құрылымдары мен желілік полиция бөлімдері де жауапты. Дегенмен, бұл ретте бірінші кезекте «Әскерилендірілген теміржол күзеті» қызметіне қойылар талаптар күшейе түседі.
«Әскерилендірілген теміржол күзеті» ЖШС Тараз филиалының директоры Еркін Мүсілімов тасымалдау процесінің қауіпсіздігін қамтамасыз ету үшін темір жолдың салалық құрылымдары басшыларының ықпалдастығы аса қажет дейді. Әрбір жұмысшыға қызметтік куәліктерін бірге алып жүру керектігі ескертілсе, профилактикалық іс-шараларды жүргізуге кедергі туындамайтынын алға тартты.
Қазір әскерилендірілген күзет қызметкерлері жол бойындағы құқықбұзушылықтың алдын алу үшін профилактикалық іс-шараларға жұмылдырылған. Айлықтың алғашқы екі аптасында темір жолды белгіленбеген жерден кесіп өткен тұрғындарға ескерту жасалып, сала мамандарының қызметтік куәліктері тексерілген.
– Филиал директоры Еркін Мүсілімовтің басшылығымен диспетчерлік қызметтерді, желілік полиция органдарын, әскерилендірілген күзет және шұғыл әрекет ететін оңтайлы топтың құқықбұзушылыққа қарсы іс-қимыл фактілері туралы хабардар етудің өңірлік схемасы әзірленді. Осы жоба бойынша күзет қызметкерлерінің әрқайсысына жадынама таратылып, міндеттері түсіндірілді. Бастапқы 15 күнде бірқатар азамат ескертулермен шектелді. Егер темір жолды белгіленбеген жерден кесіп өту фактісі тағы қайталанатын болса, айыппұл салынады. Жалпы бүгінгі күнге дейін 288 адамға ескерту берілді, – дейді шұғыл әрекет ететін оңтайлы топтың бастығы Шохан Қасымов.