Қауіпті аймақта қатер көп
«Қазақстан теміржолшысы» газетінің тілшісі
«ҚТЖ» ҰК» АҚ темір жолда пойыз басып кету жағдайларының санын азайтуға бағытталған алдын алу іс-шараларын іске асыруды жалғастыруда. Десек те, мал-жанның жол бойына шығып кетіп, пойызға басылып қалу жайттары да жоқ емес.
Сала мамандары ұсынған нақты деректерге сүйенсек, осы жылдың 10 айының қорытындысы бойынша адамдардың пойызға қақтығысуына қатысты 30 оқиға тіркелген, соның салдарынан 34 адам зардап шегіп, оның 15-і өліммен аяқталған, 19-ы түрлі жарақат алған. Зардап шеккендердің арасында үшеуі кәмелетке толмаған жасөспірім.
– Оқиғалардың негізгі үлесін азаматтардың теміржол көлігі объектілерінде болу ережелерін бұзған жағдайлар құрап отыр. Тіркелген оқиғаның 40% жағдайында немесе 12 оқиғада зардап шеккендердің ішімдік ішкені анықталса, екі жағдай құлаққап кию салдарынан болған, ал бір жағдайда адам өзін пойыз астына тастап, суицид жасаған, – дейді қозғалыс қауіпсіздігіне жауапты мамандар.
Теміржолшыларды алаңдатып отырған келесі бір мәселе, өткелдердегі жол-көлік оқиғалары болып отыр. Мәселен, жыл басынан бергі он айда теміржол өткелдерінде 24 жол-көлік оқиғасы тіркеліп, оның ішінде 3 көлік жолаушылар пойыздарымен қақтығысқан.
Осындай оқиғалардың алдын алу мақсатында осы жылдың басынан бастап темір жолда ауқымды түсіндіру жұмыстары жүргізілген. Әскерилендірілген теміржол күзетімен және желілік полициямен бірлесіп 1 570 рейд ұйымдастырылып, 2 105 жиын өткізілсе, оның ішінде оқу орындарында 66 мыңнан астам адам қамтылған. Рейдтердің қорытындысы бойынша құқық бұзушылар әкімшілік жауапкершілікке тартылып, 39 айыппұл салынған. ҚТЖ мамандары азаматтарды темір жолдағы қауіпсіздік ережелерін қатаң сақтауға, белгіленбеген жерлерде жолды кесіп өтпеуге, құлаққаптар мен зейінді төмендететін өзге де құрылғыларды пайдаланбауға, теміржол объектілерінің жанында өте сақ болуға шақырады.