Жамбылда зілзала кезіндегі іс-қимыл пысықталды
"Қазақстан теміржолшысы" газетінің Жамбыл облысындағы меншікті тілшісі
Мамандардың айтуынша, Жамбыл облысы сейсмикалық қауіпті аумаққа жатады. Соңғы екі жылда өңірде жеңіл және орташа жағдайдағы бірнеше жер сілкінісі тіркелген. Сондықтан мұнда жалпы түрлі саладағы мекеме қызметкерлерінің төтенше жағдайға дайындығы – маңызды мәселе.
Осыған орай жуырда «Жамбыл жүк тасымалы» және «Жамбыл магистральдық желі» бөлімшелерінің әкімшілік ғимаратында кезекті арнайы сейсмикалық оқу-жаттығу өткізілді. Үш қабатты әкімшілік ғимаратында дабыл белгісі іске қосылып, шартты жағдайда зілзала кезіндегі дүрбелең басталды. Жамбыл облыстық төтенше жағдайлар департаментінің құтқару қызметі келгенге дейін кіреберістегі күзетшілер екі филиалдың басшыларының нұсқауына сай сыртқы есікті ашып, іштегілердің далаға шығуына көмек көрсетті.
Оларға жүктелген алғашқы міндет – есік алдында кептелісті болдырмау. Іштен сыртқа шығуға асыққандардың бір-бірін қағып, таптап кетпеуін қадағалаған күзетшілер көпшілікті барынша сабырға шақырып, нұсқауға қарай әрекет етті.
Бөлімшелердің басшылық құрамы жылдам эвакуация бағытын айқындауға, уақытша құтқарушылар жасағын жасақтауға кірісті. Жамбыл ЖТ бөлімшесінің бас инженері Дүйсенбек Сыдықов рация арқылы жасаққа қызметкерлерді қауіпті аймақтан қауіпсіз жерлерге уақытша көшіру үшін нұсқау беріп отырды.
Төтенше жағдайлар департаментінің құтқарушылары мен жедел жәрдем қызметі де көп күттірген жоқ. Мамандар кран арқылы үшінші қабатта қалғандарды терезеден сыртқа шығарып, шартты түрде зардап шеккендерге бастапқы медициналық көмек көрсетілді.
– Арнайы оқу-жаттығуға Жамбыл облысы төтенше жағдайлар департаментінен 5 техника, 17 адам жұмылдырылды. Оқу-жаттығу жойқын жер сілкінісі кезінде мекеме қызметкерлерінің практикалық әрекеттерге дайындық деңгейін тексеру, басшылық құрамның төтенше жағдайдағы құтқару іс-әрекеттерін қалай ұйымдастыратынын байқау мақсатында өткізілді. Осы арқылы эвакуациялау картасын жасап, ғимараттан сыртқа шығарудың қосалқы жолдарын нақтылап алдық. Дабыл жүйесі жұмысының сенімділігі тексерілді. Алғашқы медициналық көмек көрсетудің тәсілдерін тәжірибе жүзінде үйрендік, – дейді бас инженер.
