Екі апталық дәріс өтті
"Қазақстан теміржолшысы" газетінің Жамбыл облысындағы меншікті тілшісі
«Қазақстан темір жолы» ҰК» АҚ қызметкерлерінің біліктілігін арттыруды көздеген «Еңбек қауіпсіздігі мәдениеті» жобасы аясында Жамбыл жол бөлімшесінде екі апталық оқу курсы өтті.
Шойын жолдың бойындағы қауіп-қатерді азайтудағы мақсатты әрі маңызды қадамдардың бірі – қауіпсіз еңбек жағдайын қалыптастыру. Қолайлы әрі сенімді ортада теміржолшылар өз міндеттерін жауапкершілікпен мінсіз атқара алады. Ал оның нәтижесі – пойыздар қозғалысы кезінде туындауы мүмкін ықтимал факторлардың азаюы.
2025 жылға арналған өндірістік қауіпсіздік жөніндегі іс-шаралар жоспарын орындау шеңберінде барлық филиалдарда «Еңбек қауіпсіздігі мәдениеті» курсы бойынша салалық құрылымдардың басшыларын, инженерлік-техникалық қызметкерлер мен жұмысшыларды оқыту жобасы осындай мақсатта қолға алынған. Компанияның ішкі тренерлері Азат Әжібеков, Шеге Зейнекен, Думан Орымбетов жүргізген екі апталық оқу курстарында қауіпсіз мінез-құлық мәдениетін дамыту жолдарын қарастыратын тренинг-сабақтар өткізілді.
Арнайы видео роликтер көрсетіліп, өндірістік жағдайда жарақат алулардың салдары мен себебіне талдау жасалды. Тренерлер орын алған оқыс жағдайларды мысалға ала отырып, оған әсер еткен техникалық факторларды саралап, түсіндіріп берді.
Сарышаған, Шығанақ, Шоқпар, Шу, Түрксіб, Боранды, Қаратау, Тараз станцияларында өткізілген оқу курстарында Жамбыл жол бөлімшесі бойынша 2300-ге жуық маман қатысып, ірі және шағын станция қызметкерлері түгел қамтылды.
