Темір жолдағы тәртіп пен тәуекел: Атырау өңірінде қозғалыс қауіпсіздігі қалай қамтамасыз етілуде
Атырау облысы бойынша меншікті тілші
Темір жолда қозғалыс қауіпсіздігі ең маңызды мәселе. Соған сәйкес өңірлердегі қауіпсіздік ревизорлары жұмысының негізгі бағыты – қозғалыс қауіпсіздігін қамтамасыз ету, қауіп-қатердің алдын алу болып саналады. Алайда, жүк және жолаушы тасымалын жүзеге асыратын салада қауіпсіздік сақтала бермейді, сондықтан да әр түрлі келеңсіз жағдайлар орын алып жатады.
Атырау аймағы бойынша Бас ревизордың орынбасары Сұңғат Түкеевтің айтуынша, аймақ теміржолындағы қауіпсіздіктің сақталуы мен қамтамасыз етілуі ревизорлық аппарат мамандардың тікелей назарында.
– Біз қашан да келеңсіздіктердің алдын алу, оны болдырмауға тырысамыз. Өткен 12 айда аймақтағы барлық темір жол мекемелерінде қозғалыс қауіпсіздігі бойынша 52 кемшілік анықталды. Соның ішінде Атырау ЖТ бойынша қозғалыс қауіпсіздігін бұзудың 1 жағдайы (инцидент) орын алды. Онда Қарабатан-496 разъезд айналымында Мақат депосына қарасты локомотивте өрт дабылы соғылған, оның себебі локомотив бригадасы тарапынан стандартты емес жағдайға дұрыс әрекет етпеуінен болған. Кемшіліктер тексеріліп, жауаптыларға тиісті шаралар қолданылды. Сондай-ақ, вагон тежегішінің реттелмеуі, қуаттандыру блогының істен шығуы, жол кедергісінен поездың кешігуі сынды т.б. жағдайлар орын алады. Сондықтан әрбір адам, маман, әсіресе темір жол қызметкерлері қозғалыс қауіпсіздігіне баса мән беріп, өте сақ болуы керек, - дейді ол.
Басшының мәліметіне сәйкес, былтыр 12 айда 596 тексеру жүргізіліп, оның ішінде кездейсоқ 58, мақсатты 510, түнгі 28 тексеру болған. Нәтижесінде 5366 кемшілік анықталды. Олардың көбі жылжымалы құрам мен техникалық құралдарды күтіп-ұстау мен пайдалану (2765%), еңбек өндірісінің технологиялық талаптарының сақталмауы (2176), құжаттамаларды, аттестацияны жүргізудегі, т.б. кемшіліктер. Одан тыс Камаздың пойызға келіп соқтығысуынан (1 наурызда) 1 теполвоз бен 11 вагон рельстен шығып, 4 жолаушы және 9 жүк пойызы кешігіп қалды және бірнеше адам жарақат алды. Бұл енді ҚТЖ кінәсы емес, Камаз жүргізушісінің қателігеген болған оқиға.
«Ақ-Жайық-7» ЖШС кінәсінен, яғни жөндеудің дұрыс жүргізілмегендігінен, дөңгелек жұбынының, серіппенің сәйкес келмеуі, вагон тірегінің ақауы орын алған. Аймақтағы жекеменшіктегі кірме жолдардың да жағдайы мәз емес. Жолдың сапасыздығы мен вагон қараушылар тарапынан тежегіш башмақты алмауы салдары вагонның дұрыс қозғала алмауына әсер еткен. Сонымен қатар кірме жолдардың өткелдерінде 3 жол-көлік оқиғасы тіркелген. Вагондардан ақау табылса оларды қайта жөнделгенше құрамнан алып тастау, жол мен бағыттамалы бұрмалар сапасы талапқа сай болмаса шектеу қою немесе жөндеп болғанша мүлдем тоқтату талабы қойылады. Құралдар мен қондырғыларға да осындай қатаң шаралар қолданылып жүр.
Бүгінде өңірде жолды күрделі жөндеу жұмыстары жүргізіліп, сол себепті ол учаскелерде жылдамдық та артқан. Тальго пойыздары сағатына 120-140 шақырыммен жүреді. Жалпы, өңірдегі жолдың 80-пайызға жуығы темір-бетон жаңа шпалдарға, жаңа рельстерге ауыстырылған. Сол себепті пойыз жылдамдығы артатыны да түсінікті. Бірақ, жолда ірі қара мал көп жүреді. Әсіресе, қауіпті саналатын жерлер Атырау-Махамбет, Махамбет-Қызылжар, Бақсай-Аққыстау, Құлсары-Шоқпартоғай, Жантерек-Мұқыр-Сағыз, Ганюшкино-Атырау аралықтары. Соған сәйкес мал басу оқиғалары да болмай қоймайды. Өткен жылы аймақ темір жолдары бойында 79 мал басу оқиғасы тіркелген.