Алматыда арнайы сабақ ұйымдастырылды
Алматыда азаматтық қорғаныс беделін арттыру жөніндегі іс-шаралар жоспарына сәйкес теміржол қызметкерлері арасында түсіндіру және практикалық оқу сабағы ұйымдастырылды.
«ҚТЖ-Жүк тасымалы» ЖШС Алматы филиалы мен «ҚТЖ» ҰҚ» АҚ Алматы магистральдық желі бөлімшесі қызметкерлері қатысқан іс-шара ҚР «Азаматтық қорғаныс туралы» Заңын басшылыққа ала отырып, Төтенше жағдайлар саласындағы уәкілетті органның №190 бұйрығына сәйкес өтті. Оқу сабағына Достық станциясы мен Алматы-1 және Алматы-2 станцияларының қызметкерлері қатысып, Алматы магистральдық желі бөлімшесінің директоры А. Жексембиев жетекшілік етті.
– Азаматтық қорғаныс – баршамызға ортақ жауапкершілік. Біз азаматтық қорғаныс талаптарын қатаң сақтап, қауіпсіздік мәдениетін күнделікті жұмысымыздың бір бөлігіне айналдыруымыз қажет. Бұл тек өзіміз үшін емес, әріптестер мен жолаушылардың қауіпсіздігін қамтамасыз ету үшін аса маңызды фактор екенін естен шығармауға тиіспіз, – деді өз сөзінде Асқар Төреханұлы.
Сонымен қатар азаматтық қорғанысты ұйымдастыру және төтенше жағдайлардың алдын алу жөніндегі бөлімнің жетекші маманы Б.Еспаев, азаматтық қорғаныс бойынша инженер Н.Серікпаева оқу сабағын ұйымдастырып қана қоймай, жоғары деңгейде өтуіне атсалысты.
Сабақ барысында азаматтық қорғаныстың негізгі талаптары, төтенше жағдайлардың түрлері басты назарға алынды. Жалпы төтенше жағдай туындаған кезде хабарлау және эвакуациялау тәртібі, жеке және ұжымдық қорғаныс құралдарын пайдалану жолдарының маңызы сөз болды. Сонымен қатар станциялар мен бекеттер аумағында болуы мүмкін қауіп-қатерлердің алдын алу бойынша нақты мысалдар келтіріліп, іс-қимыл алгоритмдері талқыланды.
Ерлан ҚУАНДЫҚОВ,
Алматы-1 станциясының бас инженер