Ақтөбеде теміржол өткеліндегі қауіпсіздік мәдениеті тексерілді

Ақтөбе станциясы аумағындағы Жилгородок теміржол өткелінде «Қауіпсіз өткел» акциясы аясында рейд өтті. Автокөлік ағыны көп тұста теміржолшылар мен желілік полиция және прокуратура өкілдері жүргізушілермен жұмыс жүргізді.

«Заң мен тәртіп» тұжырымдамасы аясында өткізілген акция теміржол өткелдеріндегі қауіпсіздік мәдениетін арттыруға бағытталған. Рейдке қатысқан Ақтөбе локомотив пайдалану депосы бастығының өндіріс жөніндегі орынбасары Бақытғали Джанесов бастаған теміржолшылар, Қалалық полиция департаменті мен көлік прокуратурасының өкілдері жүргізушілерге теміржол өткелдерінен қауіпсіз өту ережелерін және жол-көлік оқиғаларының алдын алу жайын түсіндірді.  

«Жол қозғалысы ережелерін елемеу адам өміріне қауіп төндіріп, қайғылы оқиғаларға әкелуі мүмкін. Сондықтан жүргізушілер мен жаяу жүргіншілерді бағдаршамның, дыбыс белгілерінің талаптарын қатаң сақтауға, шлагбаум жабылған кезде өткелден өтпеуге шақырамыз, жауапкершілік тек теміржолшыларға немесе тәртіп сақшыларына жүктелмейді, ол бәрімізге ортақ екенін естен шығармайық», – деді Б.Джанесов.  

Жилгородоктағы теміржол өткелі – көлік қозғалысы қарқынды учаскелердің бірі. Осыған байланысты мамандар жүргізушілерге жабық шлагбаумды айналып өтпеу, тыйым салатын бағдаршам жанғанда өткелге шықпау, теміржол үстіне тоқтамау және пойыздың жоқтығына көз жеткізбей қозғалысты бастамау керектігін түсіндірді. Жүргізушілерге арнайы жадынамалар таратылып, теміржол өткелдерінде жіберілетін өрескел қателіктердің қайғылы салдары туралы айтылды.  

Еске салайық, биыл ҚТЖ еліміздің барлық өңірлерінде «Заң мен тәртіп» тұжырымдамасын іске асыру аясында «Қауіпсіз темір жол» және «Қауіпсіз темір жол өткелі» екі бірдей профилактикалық акциясын өткізуде. Іс-шаралар темір жолда қауіпсіз мінез-құлық мәдениетін қалыптастыруға, өтпелерде ЖКО-ның алдын алуға және көліктің үздіксіз жұмысын қамтамасыз етуге бағытталған.