Семейлік теміржол күзеті желі бойындағы бақылауды күшейтті
Абай облысы бойынша меншікті тілші
Шығыстағы күзет қырандары күз басталысымен қызмет қарқынын біршама арттырды. Қыркүйектің 2-ші жұлдызынан бастап ӘТЖК Семей филиалының жігіттері Аягөз бен Семей станциялары арасында жедел-алдын алу айлығын бастады.
Осыған дейін қыркүйектің соңына дейін жалғасатын айлықтың маңызы жайында ақпараттық жиын өтіп, атқарылатын жұмыстар қатары жан-жақты пысықталған болатын. Желі бойындағы барлық іс-шаралар «ҚТЖ-ҰК» АҚ-ның 2026- 2027 жылдарға арналған кешенді жоспары аясында жүргізілмек.
Филиал директоры Самат Райымбековтің тікелей бастамасымен қолға алынған бұл іс-шараның ауқымы жоғары. Атап айтсақ, Аягөзден басталған тексеру, қадағалау жұмыстары аралық станциялар бойынша да толыққанды жүргізілуде. Күзет қызметінің сарбаздары бірінші кезекте станция басында тұрған жылжымалы құрамдарды жіті тексеруде. Бүліну мен мүліктерді жымқыру іздерін анықтау және жүк вагондарындағы тауардың бүтіндігі бірінші кезекте назарға алынған. Күзет қызметкерлері теміржолшыларды желі бойындағы күмән тудыратын жағдайлар мен мүліктерді аман-сақтау бойынша тиісті нұсқаулықтар жайлы ақпараттандыруда.
Сонымен қатар желі бойындағы ӘТЖК Семей филиалы қызметкерлерінің жұмыс орындары мен күнделікті қызмет бабы да жіті тексерілуде. Мұның сыртында арнайы квадрокоптер арқылы желі бойына әуеден де бақылау жүргізілді.
Түйіндей айтар болсақ, семейлік теміржол күзетінің қызметкерлері жоспарлы жұмыстарды мейлінше күшейткен. Бөлімшеге қарасты 1394 шақырымдық телім бойы толықтай сенімді қолда тұр. Желі бойындағы жағдай тұрақты бақылауда.