Мұнай қоймасынан өрт шықты

Бұл кезекті оқу-жаттығу емес. «Kyzylorda Refinery» ЖШС мұнай қоймасында тұтанған өрт шынымен қорқынышты еді. Теміржол инфрақұрылымына қауіп төндірген өрт Қызылорда өрт сөндіру пойызының күшімен толық сөндіріліп, 9 вагон қауіпсіз жерге шығарылды.  

Қара түтіні будақтап айналаны торлап алған өрт ошағына  өрт сөндіру пойызы келіп жеткеннен кейін 23 минут ішінде сөндірілді. Тілсіз жаудың ошағы Белкөл станциясы маңындағы Саяхат шағын ауданының өнеркәсіптік аумағында орналасқан «Kyzylorda Refinery» ЖШС мұнай қоймасында тұтанған. Өртті сөндіру үшін 7 қыркүйек күні сағат 17:00-де Қызылорда облысы ТЖД ӨТБҚ бастығы, аға лейтенант Мақсат Досмағанбетов Қызылорда станциясының өрт сөндіру пойызынан көмек сұратты. Оқиға орнынан 18 шақырым қашықта орналасқан өрт сөндіру пойызы 17:15-те Ақтөбе ЖОББ кезекшісі Әділовтің №1 бұйрығымен дабыл бойынша көтерілді. Нұсқаулыққа сай әрекет еткен жеке құрам санаулы уақыт ішінде жиналып, құрал-саймандарын сайлап, локомотивің тіркелуі, пойызды станцияның оңтүстік алқымындағы жолға шығару секілді әрекеттер оперативті түрде жүргізіліп, 17 сағат 31 минутта жүріп кетті.  17:46-да өрт сөндіру пойызы Белкөл ст. 4-жолына келіп жетіп, жұмысқа кірісті. Қоймада  әрқайсысы 60 тонналық екі резервуардағы мұнай өнімдері 200 шаршы метр аумақта жанып жатты.

Оқиға орнында жедел штаб құрылып, жауапты тұлғалар барлық күшті тілсіз жаумен күреске бағыттаған. Топ құрамында Қызылорда ЖТ бөлімшесінің бас инженері Күлхан Белкібаев, Қызылорда магистральдық желі бөлімшесі директорының орынбасары Қайрат Төрединов болды.  

Дереу іске кіріскен өрт сөндірушілер 18:10-да бір ГПС-600 және бір СВП оқпанын бере отырып, көбікпен шабуыл тәсілімен, алдымен өрттің жалынын өшіруге тырысты.  Көбікпен буып-жабу, сумен өшіру әдістерімен 18:20-да өрт оқшауланып, 18:25-те толық сөндірілді.  

Әрине Өрт сөндіру пойызымен бірге жергілікті жауапты мекемелерден 60 адамдық құраммен 1 БШМ, 1 ША, 3 АЛ, 11 АЦ, 2 АНР арнайы техникасы, сондай-ақ «Қызылорда тазалығы» мекемесінің 5 су тасу көлігі секілді 18 бірлік техника да жұмылдырылған.

Өрт салдарынан зардап шеккендер жоқ. Теміржол инфрақұрылымы нысандарына және пойыздардың қозғалысына қатер төнген жоқ. Өрттің шығу себептері мен мән-жайын Қызылорда облысының ТЖД тарапынан тергеліп, зерделенуде.