Қазақстан темір жолының 120 жылдығына орай «Темір аю» жобасы іске қосылды

«ҚТЖ-100 жас есім» бағдарламасы аясында тұсауын кескен жобаның мақсаты – қазақ теміржолының қалыптасу тарихын зерттеу және насихаттау, қайырымдылық іс-шараларын жүргізу, сонымен қатар теміржолшы мамандығының танымалдығын арттыру.  

Жобаны ойлап тапқан – «Жолаушылар тасымалы» АҚ «Экспресс» филиалының Алматы теліміндегі жолаушылар пойызының жолсерігі  Диана Бимбетова. Автордың айтуынша, жобаның басты кейіпкері – Қазақстан қалаларына пойызбен саяхатқа шығатын Темір есімді аюдың өз паспорты бар, әр станцияға келгенде оған белгі соғылып, мөр қойылады. Әрбір станцияда оны «ҚТЖ-100 жас есім» бағдарламасының қатысушылары қарсы алып, аю Темірмен бірге қайырымдылық іс-шараларын жүргізеді.  

– Неліктен таңдау аюға түсті? Аю – күш символы ретінде интерпретацияланады, ал теміржол өмір жолы мен техникалық прогресс күші болып табылады. Темірге кәсіби нысанды киім «Қазақстан темір жолына – 120 жыл» және «100 жас есім» логотиптерімен тігін шеберханасында тігілді. Аю Темірдің «Инстаграм» мен «Тик Токта» аккаунты бар,  ол жерде біз қатысушылар игі істеріміз жайлы көп адамның білуіне және басқа адамдардың жақсылық жасауына себепкер болуымыз үшін фотосуреттер мен видео жүктеп отырамыз. Сонымен қатар Инстаграм парақшаға қазақ теміржолының қалыптасуы мен даму тарихы, теміржолшылардың жұмыс күндері мен жетістіктері жүктелетін болады. Тұтас Қазақстанда қайырымдылық іс-шараларын жүргізіп, аю Темір Алматы қаласына қайтып оралады, бұл жерде оның құпия тағы бір миссиясы болады, – дейді жоба авторы Диана.

«ҚТЖ-100 жас есім» бағдарламасының қатысушысы, жылдың үздік корпоративті волонтері, «Самұрық-Қазына» АҚ Жастар форумының қатысушысы, экономика ғылымдарының магистрі Диананың бұл жобасын басшылық қолдап, оны жүзеге асыруға рұқсат берген. Диана аю Темірмен Логистика және көлік Академиясына барды. Сонымен қатар жаңа кейіпкер биыл 26-29 ақпан аралығында Шымкент қаласында «100 жас есім» оқу модуліне қатысады. Сол жерде оны автор батысқа саяхатқа шығарып салады.