«Мектепке жол»: тағы 40-қа жуық бала оқу-құралын алды
Ақтөбе облысы бойынша меншікті тілші
Жем локомотив пайдалану депосы мен кәсіподақ ұйымы бірлесіп, «Мектепке жол» республикалық қайырымдылық акциясына үн қосып, жаңа оқу жылы қарсаңында 40-қа жуық балаға оқу-құрал сыйлады, деп хабарлайды Rail-news.kz.
Жер-жерде Білім күніне дайындық қызу жүріп жатыр. Жыл сайын жаңа оқу жылы қарсаңында бағасы шарықтай түсетін оқу құралдары мен мектеп формасын алуға кез келгеннің шамасы келе бермейді. Әсіресе, бір үйден бірнеше бала мектепке баратын үлкен отбасылар үшін оңай емес. Сондықтан мекеме тарапынан жасалған сыйлық ата-ананың да, баланың да көңілін көтеріп, алғыстарын жеткізді.
– Биыл біздің мекемеде әріптестеріміздің 40-қа жуық баласы 1 сыныпқа барады. Осы мектеп табалдырығын аттайтын бүлдіршіндерге оқуға қажетті құралдар толтырылған сөмке тарту еттік. Оған қоса ұжымдық шартқа сай белгілі санаттағы отбасыларға қаржылай көмек беріледі, – дейді кәсіподақ ұйымының төрағасы Нұрлан Өтесеитов.
Әрдайым игі шараның басында жүретін Жем локомотив пайдалану депосының басшысы Дәулетқали Жалмұғамбетов балаларды жаңа оқу жылымен құттықтап, оларға сәттілік, мықты денсаулық тіледі.
– Бала – ел болашағы. Әр баланың балалық шағы бақытты, алаңсыз болуға тиіс. Біздің мекемеде балаларды мектепке дайындау шарасы жылда дәстүрлі түрде өтеді. Балаларымыздың білімге құштар, дарынды, алғыр, зерек болуына тілекшіміз, – деді депо бастығы.