Ақкөл станциясында 400 текше метр қар шығарылды
«Қазақстан теміржолшысы» газетінің тілшісі
Соңғы аптада қалың жауған қар теміржол бойын басып қалып, теміржолшылар жаппай қар тазалау науқанына жұмылған.
Ақкөл станциясының бастығы Нұрбол Назаровтың айтуынша, қар тазалау жұмыстарына соңғы күнде 38 адам мен 2 техника жұмылдырылған. Олардың ішінде станциядан бөлек, жол, белгі беру және байланыс, электрмен қамту, вагон шаруашылықтары мен әскери күзет қызметкерлері де бар.
– «Жұмыла көтерген жүк жеңіл» демекші, бәріміз бір станция торабында отырғаннан кейін кезектесіп кезекшілік ұйымдастырып, станция жолдарын, екі жақ алқымды, бағыттама бұрмаларын, перегондарды, жолаушылар платформаларын қардан тазаладық. Техникамен тазалау қиын қалтарыстарды теміржолшылар өздері қол күшімен тазалап, қозғалысқа қауіп төнбеуіне жағдай жасап жатырмыз. Нәтижесінде осы екі күнде 400 текше метрден астам қар тазаланып, шығарылды, – дейді станция бастығы.
Ал жалпы қыс басталғалы Ақкөлде 3 рет қар тазалау науқаны өтіп, 1000 текше метрдей қар шығарылған.