Қауіпсіздік – қаруы
Қызылорда облысы бойынша меншікті тілші
Қазалы вагон пайдалану депосында табан аудармай қырық жылдан аса тер төгіп еңбек еткен майталман теміржолшыны әріптестері үлкен құрметпен зейнетке шығарып салды.
Кәсіби мереке қарсаңында зейнет жасына жеткен Рабат Сембіұлы ұжымның жартысына тәлімгер, жас буынға үлгі тұтар ұстаз болды. Ол сонау 1991 жылы-ақ «Құрметті теміржолшы» атанды. 1996 жылы "Адал еңбегі үшін" медалімен марапатталды.
– Қазалы пайдалану вагон депосында 42 жыл еңбек еткен Рабат Сембіұлы сынды кәсіби мамандардың орны бөлек. Еңбек жолын жылжымалы құрамның жөндеушісінен бастаған ол сол дәуірдегі Құрметті теміржолшылар М.Акимов пен К.Беримбаев секілді тарландардың шәкірті болғанын мақтан тұтады. Және Кеңес Одағына белгілі Батин, Басалаевтар тәжірбесін меңгеріп Москвада оқыған. Әріптесімізді қимасақ та зейнетке шығарып салып отырмыз. Ендігі жерде бейнетінің зейнетін көріп, қалауынша өмір сүрсін деп тілек айтамыз, – дейді депо бастығы Арғын Орымбаев.
Құрмет пен қошеметтері үшін депо басшылығы мен кәсіподақ ұйымына алғыс айтқан Рабат Сембіұлы: «Менің бас қаруым қауіпсіздік болды, қауіпсіздікті нысанаға алып еңбек етсеңдер жемісін жейсіңдер» деп әріптестеріне жұмыста сәттілік тіледі.