Үздік қызметкерлер ұлықталды
Маңғыстау облысы бойынша меншікті тілші
Түбек теміржолында Республика күніне орай мерекелік кеш ұйымдастырылды. Маңғыстау жүк тасымалы бөлімшесінде өткен іс-шара барысында үздік қызметкерлердің еңбегі еленіп, марапатталды.
Салтанатты жиынды ашқан бөлімшенің бас инженері Қарақат Жақанов әріптестерін мерекемен құттықтай келе, еліміздегі елеулі күннің мән-маңызына тоқталды. Мемлекетіміздегі тыныштық пен бейбітшіліктің нәтижесінде түрлі сала өркендеп, соның ішінде темір жол да дамып, күннен күнге оң өзгерістер орын алып жатқанын тілге тиек етті. Бұдан кейін орталық теміржолшылар кәсіби одағының өңірдегі өкілі Сәрсенбай Есенқұлов сөз алып, жылы лебізін білдірді.
Ақжарма тілектерден кейін марапаттау рәсімі басталды. Зейнеткерлер мен түбек теміржолының түрлі бағытында еңбек етіп жүрген еңбек озаттарына «Қазақстан теміржолына-120 жыл», «Маңғыстау теміржолына-60 жыл» төсбелгілері табысталды. Тағы бір топ теміржолшы Маңғыстау жүк тасымалы бөлімшесі директорының Алғыс хатын алды. Сондай-ақ аймақтағы өндірістік кәсіпорындардың жас мамандары арасында өткен волейбол жарысында екінші орын алған Маңғыстау теміржолы командасына кәсіподақ комитеті атынан ақшалай сыйлық табысталды. Іс-шара одан әрі қарай өнерлі теміржолшылардың ән шашуына жалғасты.