Құрылыс жұмыстары басталды
Ақтөбе облысы бойынша меншікті тілші
Осыған дейін хабарлағанымыздай, 15 сәуірден бастап Ақтөбе өңірінде жеті вокзалды жаңарту жұмыстары басталды. Құрылыс басқармасы қайта жаңартылатын вокзалдар жобасымен таныстырды.
Солардың қатарында жарты ғасыр бұрын салынған Ақтөбе вокзалы да бар. Мердігер мекемелер бекітіліп, құрылыс басқармасы жұмысқа кірісті.
«Жұмыс бүгіннен басталады. Отыз шақты техникамызды әкелдік. Халыққа кедергі жасалмайды. Сонымен қатар қауіпсіздік шаралары да ескеріледі. Барлық жұмыстар пысықталды», – деді мердігер компания өкілі Ануар Талдықбаев.
Ақтөбе теміржол вокзалы 1976 жылы пайдалануға берілген. Соңғы рет 2013 жылы күрделі жөндеуден өтті. Мұнда күніне 20-ға жуық пойызды қабылдап, 5 мың жолаушыға қызмет көрсетеді.
«Вокзалдағы күрделі жөндеу жұмыстары вокзал жұмысына кедергі келтірмейді. Атқарылған жұмыстардың нәтижесін желтоқсан айында көреміз. Инженерлік желі де толық жаңартудан өтеді», – деді Ақтөбе теміржол вокзалының басшысы Арсен Кенжин.
Ақтөбе вокзалының аумағы 7 мың шаршы метр. Жаңа жобаны таныстыру кезінде жыл соңына дейін теміржол вокзалының қасбеті жаңартылып, қызмет көрсету орындары заманауи кейіпке ендіріледі. Жұмыстар жыл соңына дейін толық аяқталуы тиіс. Соның ішінде байланыс желісі жаңартылады. Пандустар, күту залы, өрт қауіпсіздігі, ана мен бала бөлмесі, бақылау камералары жаңаша сипат алады.
Ал вокзал алдын ретке келтіру, жол жөндеу жұмыстарын қалыпқа келтіру, жарықтандыру, демалыс алаңын ұйымдастыру жұмыстары жергілікті әкімдік тарапынан атқарылатыны айтылды. Сонымен қатар Алға, Қандыағаш, Ембі, Қарауылкелді, Шұбарқұдық және бір ғасырлық тарихы бар Шалқар вокзалы күрделі жөндеуден өтеді.