«Әкем – асқар тауым»: Қызылордада әкелер мен ұлдар сайысы өтті
Қызылорда облысы бойынша меншікті тілші
Қызылорда магистральдық желі бөлімшесінің директоры Ербол Саулебековтің төрағалығымен «Бақытты отбасы» партиялық жобасы аясында «Әкем – асқар тауым» атты мерекелік іс-шара бөлімшенің кәсіподақ ұйымы тарапынан ұйымдастырылды.
Өңірдің теміржол мекемелері басшыларынан құралған әділ қазыларға әріптестерінің сайыстағы өнерлерін таразылау оңай болмады.
«Бұл тағылымы мол шараның басты мақсаты – отбасы институтындағы әкенің рөлін дәріптеу, әке мен бала арасындағы байланысты нығайту, ұлттық құндылықтарымызды ұлықтай отырып, болашақ ұрпаққа өнегелі тәрбие беру. Әке – отбасының тірегі, қорғаны. Оның әрбір ісі, сөзі, ұстанымы ұл-қызының болашағына бағыт-бағдар береді. Осы орайда ұйымдастырылған сайыс форматындағы іс-шара 5 кезеңнен тұрды. Сайыс оған қатысушы әкелер мен ұлдарының өнері мен шеберлігін, бір-біріне деген жақындығын айшықтай түсті», – дейді бөлімшенің кәсіподақ ұйымының төрағасы Салтанат Махмутова.
Әкелер мен ұлдар қатысқан дүбірлі жарыста жеңімпаздар деп сайыстың барлық сатысында тұшымды жауап берген Ринат Хоромбаев пен ұлы Бекзат Бекбалаев танылды. Одан кейін жеңімпазға сәл-пәл есе жіберген Қанат Оспанов пен ұлы Айсұлтан 2-орынға жайғасса, 3-орынды Еркебұлан Сүлейменов пен ұлы Иманәлі Шәрібек еншіледі. Кәсіподақ ұйымы тарапынан дайындалған бағалы сыйлықтар жарыс жеңімпаздарына тарту етілді. Басқа да қатысушылар жарыстан құралақан қайтпады. Ұйымдастырушылардың айтуынша, мұндай шаралар алдағы уақытта да жалғасын табатын болады.
