Жол жаңарады – қауіпсіздік нығаяды

Қызылорда магистральдық желі бөлімшесі биылғы жылы теміржол табанын заманауи технологиялық талаптарға сәйкестендіру бағытында ауқымды жұмыстар атқаруда. Бөлімшеге қарасты теміржол учаскелерінде күрделі, орташа, ағымдық, жоспарлы және күнделікті жөндеу-күтім шаралары жүйелі түрде жүргізілуде.

Бүгінгі таңда Қаракеткен – Қараиірім, Шиелі – Ақмая разъезі, Жалағаш – Тереңөзек, Екпінді бекеті – Төменарық, Төменарық – Бортескен бекеті, сондай-ақ Қазалы ؘ– Бекбауыл учаскелерінде жөндеу жұмыстары жоспарға сай іске асырылуда. Қозғалыс қауіпсіздігін қамтамасыз ету, теміржол учаскелерінің сапасын арттырып, ұзақмерзімді пайдалануға жарамды ету мақсатында жүргізіліп жатқан жұмыстар алдын ала бекітілген кестеге сай атқарылуда.  

Біз Қызылорда жол дистанциясының Бәйгеқұм станциясы мен 20-бекет телімдері арасындағы жол бөлігінде ластанған балласт қабатын тазалау жұмысына куә болдық. Техникадан, әсіресе РМ техникасының көмегі зор екен. Жалпы алғанда, жыл соңына дейін бөлімше бойынша 24,2 шақырымдық жолдың балласт қабаты жол машиналарымен толықтай тазартылмақ. Сонымен қатар 50 жаңа бағыттамалық бұрма жиынтығын орнату жоспарланған.

Бөлімшенің жол бөлімі басшысы Ахметқали Елеусіновтің айтуынша, ақаулы жерлерді жою және рельс буындарының тұтастығын қалпына келтіру үшін өздігінен жүретін рельс дәнекерлеу машиналары мен алюминотермитті дәнекерлеу әдістері қолданылып отыр. Бұл тәсілдер дәнекерлеу сапасын арттырумен қатар жұмыс өнімділігін де арттыруға мүмкіндік береді.

Жөндеу жұмыстары барысында Қырқыншы машиналандырылған станциясының жол машиналары белсенді пайдаланылуда. Жұмыстың сапалы орындалуын Актөбе учаскесінің бастығы Мұрат Таужанов, кешен бастығы Қуаныш Мұханбетияров және Қырқыншы жол машиналары станциясының Қызылорда учаскесінің бастығы Ербол Рүстемов өз бақылауына алып, технологиялық талаптардың қатаң сақталуына күш салуда.

Машинистер Сағынай Адайбек, Марат Кенбаев, Ербол Исатаев, машинист көмекшісі Ерлан Жайлыбаев және Нұрлыбек Тағаниязов теміржол техникаларының үздіксіз жұмысын қамтамасыз етуде. Инженер Нұрболат Сақтағановтың айтуынша, жазғы ыстық маусымға байланысты жөндеу жұмыстары кешкі салқын уақыттарда басталып, түнгі және таңғы мезгілдерге дейін жалғасқан.

Жол сапасын арттыруда РМ, «Дуомат-3338» машинасының бастығы Қайрат Нұрпейісов, «ДГС-562» техникасының машинисі Болатбек Көлдеев және «ПБР-868» жол техникасын басқарған Артур Төлеуовтер де жоғары кәсіби шеберлік танытып, толаскез уақытын тиімді пайдалануға күш салуда.