Қызылорда станциясы жоспарды асыра орындады

Қызылорда станциясының мамыр айындағы өндірістік көрсеткіштері көңіл көншітерлік. Станция теміржолшылары жоспарды межеден асыра орындап, пойыздардың қозғалыс қауіпсіздігін сақтауда да кемшілік тіркелмеген.

Қазіргі таңда станцияны тәжірибелі теміржолшы Қайрат Төрединов басқарады. Мамыр айының қорытындысына көз салсақ, 2614,8 вагондық жүк тиеу жоспары 2656 вагонға жеткізіліп, меже 102 пайызға орындалған. Ал тонна түрінде алсақ, 161 441 тонналық жоспардың орнына 178 320 тонна жүк тиеліп, 110 пайыздық нәтиже көрсеткен.  

– Теміржолшылардың қажырлы еңбегі ескерусіз қалған жоқ. Салада ұзақ жыл еңбек еткен мамандар арнайы марапатталып, көптің қошеметіне бөленді. Атап айтқанда, 43 теміржолшы – он жылдық еңбегі үшін, 22 қызметкер-жиырма жылдық тәжірибесі үшін және 13 адам - отыз жылдан астам үздіксіз қызмет еткені үшін төсбелгімен марапатталды. Бұл – ұлттық компания тарапынан жұмысшы мамандығы жылы теміржолшыларға көрсетілген шынайы құрмет деп білеміз. Әріптестеріміздің еңбегі лайықты бағасын алып, ұжымға тың серпін, үлкен мотивация беріп отыр, – дейді станция бастығы Қайрат Төрединов.  

Қызылорда станциясы – тәртіп пен табыстың нақты көрінісі. Озат еңбек ұжымының абыройы бүкіл аймақ теміржолшы мерейі. Мамыр айында осындай құрметке бөленген қызылордалық ұйымшыл ұжым үшін алынбайтын қамал жоқ. Қауіпсіздік көрсеткіштері жоғары, маневрлік және пойыздық жұмыстар қатаң тәртіппен, барлық техникалық және еңбек қауіпсіздігі талаптарын сақтай отырып жүзеге асырылуда.