Қозғалыс қауіпсіздігі мен тасымал мәселесі басты назарда

Нормативтік-құқықтық құжаттарды дұрыс рәсімдеу, тасымалданатын жүктердің сақталуы, көліктегі кеден қызметі, ақпараттық жүйелер, тарифтік саясат мәселелері – пойыздар қозғалысының қауіпсіздігін қамтамасыз етуге тікелей әсер ететін негізгі факторлар. Осы жұмыстар қалай жүйелі жүргізілуі керек?  

Тараз қаласындағы «Достық» үйінде өткен республикалық семинар-тренингте осы мәселелер талқыланды. Жиынды ашып берген «ҚТЖ – Жүк тасымалдау» ЖШС «ЖТ Жамбыл бөлімшесі» филиалының директоры Айдын Сеитбенбетов семинарға қатысушыларға сәттілік тіледі. Ұйымдастырылған іс-шараның маңыздылығына тоқталды.

«Қазақстан теміржолы – Жүк тасымалы» ЖШС-нің жүк және комерциялық жұмыстар департаментінің бас менеджері Ержан Гаипов, аталған департаменттің Сақталмаған тасымалдар бойынша талаптарды реттеудің функционалдық бағыты басқармасының бас менеджері Лаура Алатаева, Жүйелік жобалар департаментінің жүйелік жобаларды функционалдық талдау бағытының менеджері Мария Жангиреева баяндама жасап, пойыздар қозғалысының қауіпсіздігін қамтамасыз етуде алдын ала профилактикалық жұмыстарды жүргізуді күшейту, нормативтік-құқықтық құжаттарды ресімдеу жолдарына тоқталды. Мамандар тасымалданатын жүктердің сақталуы секілді тақырыптарды да кеңірек қамтып өтті.

Сондай-ақ тарифтік саясат департаментінің бас менеджерлері Зәбира Ахажанова, Наталья Байғазина, Гүлмира Қуанова теміржол арқылы жүк тасымалының тарифтік саясатындағы өзгерістер мен жаңалықтар туралы айтып өтті.

Көліктегі кеден ісі қызметінің бас менеджері Бибігүл Насырова, жүктермен коммерциялық жұмыс департаментінің жүк жұмысын тексеру тобының менеджері Жанбек Тусупаев, жүктермен коммерциялық жұмыс департаментінің тасымалдау шарттары жөніндегі топ менеджері Елена Сатыбалдина жүк тасымалы бөлімшелері филиалдарындағы кедендік қызмет мәселелерінде кездесетін түйіткілдерге тоқталды. Ақпараттық жүйелермен жұмыстың жайы да қозғалды.  

Алғашқы теориялық бөлімде спикерлер Жүк тасымалы бөлімше филиалдарында құжат ресімдеуде туындайтын проблемаларды талдап-саралап берді. Семинар-тренингтің практикалық бөлімінде осы түйіткілдердің шешімін табу жолдарын бірлесе талқыға салды.  

Сұрақ-жауап форматында өрбіген семинардың станция басшылары мен жүк тасымалына қатысты құжаттар ресімдеумен айналысатын мамандар үшін берері көп болды.

Екі күнге созылған семинарда қатысушылар теориялық білім базасын толықтырып, практика жүзінде туындайтын жағдаяттық жайлардың шешімін іздеп, талдау-сараптама жасады.

Республикалық семинар-тренингке қатысушылар келесі күні Тараздың тарихи-мәдени нысандарын аралап, экскурцияға шықты.