Қазақстандық жолсеріктер Deutsche Bahn тәжірибесін үйренуде

«Жолаушылар тасымалы» АҚ вагондардағы сервистік қызмет көрсету сапасын арттыруда әлемдік тәжірибеге сүйенуді жалғастырады. Қазақстандық жолсеріктер Германияның ұлттық тасымалдаушы Deutsche Bahn компаниясының шеберлік сағатына қатысты.    

Ұлттық тасымалаушы соңғы жылдары германиялық Deutsche Bahn компаниясымен серіктестікті арттырып, бірнеше жобаларды бірлесе атқаруда. Ең басты мақсат – клиентке мойын бұру. Оның ішінде операциялық тиімділік, маркетинг пен сатылым, жылжымалы құрамды дамыту жобалары бар. Бұл бағытта компания қызметкерлері мен жолсеріктер арасында методикалық және практикалық семинар- тренингтер жиі өтеді. Кезекті оқыту семинары Ақтөбеде өтті. Жолаушыға қызмет көрсету сапасын арттыруға бағытталған семинарға «Жолаушылар тасымалы» АҚ-на қарасты Батыс аймақтық филиалының жолсеріктері қатысты.  

«Әр жолаушы назарда болу керек. Сапар барысында клиентті ести алу маңызды. Қажеттілікке, сұранысқа сай бағдарлай білу үйлесімді болса, қызмет сапасы да жүйелі деген сөз. Әлеуметтік қажеттілігі әртүрлі адамдармен жұмыс істегенде үнемі өзгерістер мен толықтырулардың болуы заңдылық. Бүгінгі семинар осы тақырыпты қамтыды. Жолаушылар тасымалы қызметі стандартындағы өзгерістер. Бізде «ҚТЖ» ҰК» АҚ-мен арада бірлескен жобалар аз емес. Астана, Алматы, Ақтөбе қалаларында түрлі форматта кездесулер өтті.  Қазақстандық әріптестеріміз тарапынан көптеген қызықты ұсыныстар естідік. Интерактивті материалдар арқылы маңызды ақпараттар мен бөлістік, бұл жұмыс барысында тиімді деп ойлаймыз», – деді эксперт Ирина Балзер.

Сонымен қатар, семинарда Deutsche Bahn компаниясының серіктесі Фредерик Энандер аудармашы арқылы баяндама оқыды. Ол сервисті жақсарту үшін енгізілетін озық идеялар қарапайым ұсыныстардың арасында болатынын айтты. Жолаушының қажеттілігіне, сұрақтарына мән бере білу кері байланысты нығайтып, дамуды көрсететіні сөз болды.  

Сонымен қатар билеттерді онлайн сатуды жетілдіру, әлеуметтік маңызды пойыздардағы мүмкіндігі шектеулі жолаушылар вагонға кіргеннен шыққанға дейін ерекше назармен қызмет көрсету қажеттілігі айтылды.  

«Бүгін әріптестеріміз негізгі стандартқа енгізілген өзгерістермен танысты. Бес учаскеден басшылық құрам, жолсеріктер келді. Өздерінің сұрақтарын қойды. Ашық диалог болды. Ерекше қажеттілігі бар жолаушылармен қарым-қатынас туралы детальді түсіндірулер болды. Көзі нашар көретіндер, орнынан қозғала алмайтын мүгедектігі бар жолаушыларға қалай қызмет көрсетілу керек екені түсіндірілді», – деді «Жолаушылар тасымалы» АҚ Батыс аймақтық филиалының басшысы Ердәулет Сейтқазинов.  

Семинар барысында тәжірибе алмасумен қатар күйзеліске төзімділік, жолаушымен қарапайым байланысқа келу, жанжалды басқара білу шеберлігі, коммунакация ерекшеліктері айтылды. Интерактивті тақтада көрсетілген шеберлік сағатының материалдарын қатысушылар суретке түсіріп алып отырды. Семинарға қатысқандарға арнайы сертификат берілді.