Вагон қараушыдан ұстазға айналған теміржолшы
"Қазақстан теміржолшысы" газетінің Жамбыл облысындағы меншікті тілшісі
Талабы жоғары, табандылықпен қатар қырағылықты қажет ететін теміржол саласында жас толқын үшін тәлімгер аға буынның тәжірибесі аса қажет.
Жамбыл вагон пайдалану депосының Шу станциясындағы техникалық қызмет көрсету орталығына келген жас мамандар аға вагон қараушы Әлім Жавтуковті өздеріне ұстаз санайды. Өйткені табаны күректей қырық жыл осы жерде тапжылмай еңбек етіп келе жатқан тәжірибелі вагоншы – осы уақыт ішінде бірнеше буынды еңбекке баулып, тәрбиелеген маман.
Міне бүгін ардагер-теміржолшы зейнет жасына толуына орай, депо басшылығы арнайы келіп құттықтап, кәсіподақ ұйымы атынан сый-сияпат жасап, құрметті демалысқа шығарып салды.
Теміржолшылар әулетінде өскен Әлім Қадысұлы 1983 жылы Алматы теміржол техникумын «Вагон шаруашылығы» мамандығы бойынша бітіріп, екі жыл әскери борышын өтеп келгеннен кейін туған жерге оралып, Шудағы вагон пайдалану депосына слесарь болып жұмысқа орналасады. Содан бергі уақытта вагон қараушыдан аға вагон қараушыға ауысқанымен, табан аудармай осы жерде еңбек етіпті. 1987 жылы Ташкент қаласында біліктілікті арттыру курсына қатысып, «Беларусьтік әдісті» қорғап шыққан. «Бұл оқу маған тәжірибемді шыңдап, теориялық тұрғыда білімімді арттыруға мүмкіндік берді», – дейді кейіпкеріміз.
Штаттан тыс қоғамдық инспектор ретінде де жетістікке жетіп, 2007 жылы «Еңбек қорғау жөніндегі үздік қоғамдық инспектор» атанған. Жоғары басшылық тарапынан бірнеше рет Құрмет грамотасы мен Алғыс хатқа ие болды. 2022 жылы Астанада өткен «Қазақстан темір жолы» ҰК» АҚ-ның 25 жылдығына арналған салтанатты жиынға арнайы шақырылып, мерейтойлық медальмен марапатталды. Өткен жылы 120 жылдық төсбелгі тақты.
Ардагер теміржолшы қырық жыл тер төккен адал еңбектің өтеуін көру де бір бақыт екенін айтады. Тәжірибелі тәлімгердің шәкірттері сөз алып, ұстаздарына деген құрметтерін жеткізіп, қырық жылғы бейнеттің зейнетің көріңіз деген тілектерін жеткізді.