Бөрітескен бекеті жаңа келбетке ие болды
Қызылорда облысы бойынша меншікті тілші
Қызылордалық теміржолшылар пайдаланылғанына жарты ғасырға жуықтаған нысандарды мердігер ұйымдардың күшімен жаңартып, сала еңбеккерлерінің еңбек жағдайын жақсартуға күш салуда.
Қызылорда магистральдық желі бөлімшесінің бастығы Ербол Саулебековтің тапсырмасы бойынша осыған дейін бірнеше ЭЦ посттары мен Бәйгеқұм, Сексеуіл станцияларындағы теміржол өткелдері жаңартылып, заманауи үлгідегі нысанға айналған. Тағы 4 нысанды пайдалануға беру үшін қарқынды жұмыс жүргізіп жатыр.
Жуырда ғана пайдалануға берілген нысандардың бірі бөлімшенің Жаңақорған ауданы аумағындағы Бөрітескен бекетінде 1975 жылы салынған, жалпы ауданы 92,16 шаршы метр болатын ЭЦ ғимараты ағымдық жөндеуден кейін адам танымастай жаңарып, жаңғырып шыға келді. Жөндеу барысында ғимараттың шатыры толық ауыстырылып, терезелері мен есіктері жаңартылды.
Қасбеті заманауи ақ-көк түсті металл қаптамамен қапталып, нысанның жалпы сыртқы келбеті заманауи бейнеге ие болды. 2025 жылға бекітілген бағдарлама аясында бұл нысанда мердігер ұйым «Теміржолсу Қызылорда» серіктестігінің күшімен 11 455 344 теңге көлеміндегі қаржыға ағымдағы жөндеу жұмыстары жүргізілді.
Сондай-ақ Қызылорда белгі беру және байланыс дистанциясына қарасты Жайылма бекетіндегі ЭЦ пост ғимаратына да ағымдағы жөндеу жұмыстары жүргізілген. Ғимарат толықтай жаңартылып, жұмысшылардың санитарлық-тұрмыстық жағдайы қамтамасыз етілді.
Қызылорда белгі беру және байланыс дистанциясының бас инженері Мейіржан Әбсадықұлының айтуынша, Жайылма бекетінде жүргізілген жаңғырту жұмыстары теміржолшылардың әлеуметтік және қызметтік жағдайын жақсартуға бағытталған. Жылы да жарық әрі қолайлы жерде еңбек ету кім-кімге де болса ұнайтыны белгілі, жұмысшылардың көңілінен толық шығып отыр.
Бөлімшенің ғимараттар мен инженерлік жүйелерге қызмет көрсету бөлімінің жетекші маманы Жалғас Құрақбаевтың айтуынша, жалпы ағымдағы жылы аймақтағы 13 нысанды жөндеу жоспарланған болса, соның 9-ы толық аяқталып пайдалануға берілген, қалған 4 нысанда жаңғырту және абаттандыру жұмыстары жалғасуда.
– Барлық жұмыстар аймақ теміржолшыларының еңбек жағдайын жақсарту, қауіпсіз әрі тиімді жұмыс ортасын қалыптастыру мақсатында жүзеге асырылып жатыр. Басты мақсат – теміржолшылардың еңбек және тұрмыс жағдайын жақсарту. Бүгінгі жаңару – ертеңгі сапалы еңбекке деген ынта мен жігер, – дейді ол.