Шиелі өрт сөндіру пойызы жаңа орынға көшірілді

Қызылорда магистральдық желі бөлімшесіне қарасты Шиелі өрт сөндіру пойызы жаңа орынға көшірілді. Бұл – теміржолшылардың қауіпсіздігі мен тұрмыстық жағдайын жақсартуға бағытталған нақты қадам және еңбек адамына қамқорлық пен қауіпсіздігінің кепілі.

Қазақстан Республикасы Инвестициялар және даму министрінің 2015 жылғы 30 сәуірдегі №544 бұйрығымен бекітілген «Теміржол көлігін техникалық пайдалану» қағидаларының 39-тармағының талабына сай, екі жақты шығу жолынан жөнелтуді қамтамасыз ету мақсатында Шиелі өрт сөндіру пойызын бекеттің 29-жолынан 10-жолға көшіру жұмыстары сәтті жүзеге асырылды. Бұл – қозғалыс қауіпсіздігін күшейтуге бағытталған нақты әрі маңызды қадам.  

Теміржол саласында әрбір атқарылған жұмыс қозғалыс қауіпсіздігімен, адам өмірімен тікелей байланысты. Осы жауапты міндетті жоғары деңгейде орындау үшін техникалық талаптармен қатар, еңбек адамдарының тұрмыстық және санитарлық жағдайына да ерекше көңіл бөлінуі – заман талабы.  

Аталған жұмыс Қызылорда магистральдық желі бөлімшесінің бастығы Ербол Тәңірбекұлының басшылығымен 2025 жылға арналған «Жол картасы» аясында жүргізілді. Оған вокзалдарда жүріп жатқан құрылыс жұмыстары кезінде шыққан ескі, бірақ жарамды материалдар тиімді пайдаланылып, кәдеге асты. Осы ұтымды тәсілдің нәтижесінде №30 Шиелі өрт сөндіру пойызы өз күштерімен модульдік ғимараттарды жаңа орынға көшіріп, оларды ағымдық жөндеуден өткізді. 

Бұл жұмыстардың басты нәтижесі – жұмысшылардың санитарлық-тұрмыстық жағдайының айтарлықтай жақсаруы. Бүгінде теміржолшылар үшін жылы, ыңғайлы, қауіпсіз әрі жайлы ғимараттар пайдалануға беріліп, еңбек етуге қолайлы орта қалыптастырылды. Бұл – теміржол саласындағы адам факторына, еңбек адамына деген шынайы қамқорлықтың көрінісі.  

Жұмыстардың сапалы әрі белгіленген талаптарға сай орындалуына Шиелі өрт сөндіру пойызының бастығы Ғалымжан Болғанбаевтың сауатты ұйымдастырушылық қабілеті зор ықпал етті. Оның айтуынша, тәжірибелі ұжымның кәсіби біліктілігі барлық шаруаның технологиялық талаптарға сай атқарылуына негіз болған. Олардың қатарында аға өрт сөндіруші Жалғас Ибатаев, бөлім бастығы Болат Жұмасейітов, газ түтінінен қорғау қызметінің шебері Нұрғали Дәуренбеков, көлік жүргізуші Ахмет Шайхымбеков және өрт сөндіруші Марат Қожатаев сынды білікті мамандарды айрықша атап өтті.