Жүректен жүрекке жылылық сыйлап...

Темір жол – тек жүк айналымы, пойыздар қауіпсіздігі, сан мен сапа көрсеткішінен тұратын жартылай әскери сала ғана емес, ол мыңдаған адамның жұмыс орны, сүйікті кәсібі, тағдырлары бір арнада тоғысқан жандардың еңбек әлемі. Осындай жауапты саланың жүгін арқалап жүрген жандардың қуанышын бөлісу – ұжымның бірлігін арттыратын асыл дәстүр. Қызылорда магистральдық желі бөлімшесінде өткен шара – соның айқын дәлелі.

Бүгінде бөлімше басшылығы ай ішіндегі туған күн иелерін арнайы қабылдап, құрмет көрсету дәстүрін қалыптастырған. Бұл жолды да бөлімше директоры Ербол Тәңірбекұлының басшылығымен, кәсіподақ ұйымының ұйымдастыруымен өткен бұл жиын ресми есеп пен құрғақ талдауға емес, адамға, еңбек адамына деген шынайы құрметке ұласты. Әріптестердің ыстық ықыласы мен ізгі тілектері АБЖ бөлімінің инженері Гүлнар Көпбергенқызының 60 жасқа толған мерейтойына арналды. Бұл тек бір адамның мерейтойы емес, теміржол саласына адал қызмет еткен тұтас бір ғұмырдың мерейі еді.  

Темірдей тәртіпке бағынған салада еңбек ету – әр минут, әр шешім, әр әрекет үшін жауап беру деген сөз. Осындай салмақтағы жұмысты абыроймен атқарып келе жатқан әріптеске көрсетілген құрмет – ұжымдық бірліктің, адами жылылықтың айғағы. Сол себепті бұл жиын жүректерді жақындатқан, жанды жадыратқан ерекше форматта өтті.  

Сонымен қатар ыстық ықылас-тілектер әрі қарай жалғасып, қаңтар айында дүние есігін ашқан тағы бірқатар әріптестерді: қозғалыс қауіпсіздігі бөлімінің бас маманы Кенже Қойшығұлованы, АБЖ бөлімінің қызметкерлері Гүлнар Сыздықова мен Айман Оразбаеваны құттықтауға ұласты. Яғни олардың туған күндері де шынайы ықылас пен ақжарма тілектерге толы ортада атап өтілді.  

– Мұндай жалпы құттықтау мен құрмет көрсету дәстүрі әріптестер үшін үлкен мотивация, жұмысқа деген жаңа серпін беретін сәтті бастама екенін өткен жылғы тәжірибе көрсетті, – дейді кәсіподақ ұйымының төрайымы Салтанат Махмутова.