Жолшылар жаңа қонысқа көшті

Сексеуіл жол дистанциясында жұмысшыларға қолайлы еңбек жағдайын жасауға бағытталған маңызды жоба жүзеге асты. Жаңартылған ғимарат теміржолшылардың кәсіби міндетін қауіпсіз әрі сапалы атқаруына толық мүмкіндік беріп отыр.  

Сексеуіл жол дистанциясының жеке ғимараты уақыт өте заман талабына сай келмей әбден тозығы жеткен еді. Ғимараттың ескіруі қызметкерлердің жұмысын ұйымдастыруға да, еңбек қауіпсіздігі талаптарын толық сақтауға да белгілі бір деңгейде қолбайлау болды. Соның салдарынан мекеме қызметкерлері әртүрлі орындарға бөлініп, бір орталықта шоғырланып жұмыс істеу мүмкіндігі болмады. Нәтижесінде бөлімше басшылығының қолдауымен ғимараттың іші-сырты, шатыры, едені толық жөндеуден өткізілді. Жұмыс бөлмелері қажеттілікке орай кей жерде кеңейтілсе, кейбірі біріктіріліп, енді бірі оқшауланды, есік-терезелер жаңартылып, көп шаруа атқарылды.

Сексеуіл жол дистанциясының бастығы Мұрат Байділдаевтың айтуынша, еңбек адамына жасалған әрбір жағдай – ең алдымен қауіпсіз қозғалыстың берік негізі.

– Теміржол саласында қауіпсіздік бәрінен жоғары. Ал қауіпсіздік тікелей адамның еңбек ету ортасына байланысты. Заманауи үлгіде жөндеуден өткізілген жұмыс орнымыздың пайдалануға берілуі бүкіл ұжымды риза етіп, жұмыстарына жаңа серпін берді десек, қателеспейміз. Қызметкердің жұмыс орны талапқа сай, ыңғайлы әрі қауіпсіз болса, ол өз міндетін де жоғары жауапкершілікпен, сапалы орындайды. Сексеуіл жол дистанциясында жүзеге асқан ғимаратты жаңарту жобасы – осы ұстанымның нақты іс жүзіндегі көрінісі. Бұл – ұжымның бірлігін нығайтып, жұмыс сапасын арттыратын маңызды қадам, – дейді дистанция басшысы.

Ғимарат заман талабына сай құрылыс материалдарымен жаңартылып, жұмыс орындары заманауи талаптарға сәйкестендірілген. Қызметкерлер үшін жайлы еңбек жағдайы жасалып, жұмыс процесін тиімді әрі жүйелі ұйымдастыруға барлық мүмкіндік қарастырылған.  Жаңа жылда жаңа қонысқа көшкен жолшылар ұжымы өздеріне көрсетіліп отырған қамқорлыққа сапалы жұмыспен жауап беруге дайын.  

Айта кетерлігі, Сексеуіл жол дистанциясы өңірдегі ең жас дистанциялардың бірі болғанымен, атқарып отырған қызметінің салмағы жеңіл емес. Әсіресе жаңа телім саналатын Сексеуіл – Қоскөл станциялары бағытындағы жолдардың бабын жасап, талапқа сай ұстау – сексеуілдік жолшылардың жауапты міндеті. Қиындығы мен жауапкершілігі мол осы жұмыстың сапалы орындалуы, сөз жоқ, еңбек жағдайына да тікелей байланысты.