Әйел – әр шаңырақтың ажары
Абай облысы бойынша меншікті тілші
Жұмыстағы жетістік бір есептен үйдегі көңіл-күйге де байланысты. Ал отбасындағы ахуалға әйелдер қауымының ықпалы мол. Жуырда Семей локмотив пайдалану депосында локомотив бригадаларының зайыптарымен өткен кездесу осы тақырыпқа арналды.
Дәстүрлі түрде өткізілетін осынау басқосуға негізінен машинистер, машинист көмекшілерінің жұбайлары шақырылған болатын. Басты мақсат – жауапкершілігі жоғары сала мамандарына отбасының қолдауы, түсіністік танытуы және қамқорлық көрсетудің маңыздылығы туралы еркін әңгіме өрбіту болды. Алдымен депо басшылығы сөз алып, локомотив бригадаларына жүктелер міндеттер туралы баяндап, әр қызметкердің бір күндік жұмыс барысы жайлы әңгіме қозғады. Сонымен қатар қызметкерлерге көрсетілер әлеуметтік пакеттер, жалақы мәселесі де қозғалды. Семей локомотив пайдалану депосының республикалық деңгейдегі жетістіктері жайлы арнайы түсірілген бейнефильм де көрсетілді. Артынан депо ғимаратына шағын экскурсия да ұйымдастырылды.
– Әр машинистің, көмекшінің, локомотив бригадасы мүшесінің артында отбасы тұр. Әйел – әр шаңырақтың ажары. Әйелдер – күтетін, қолдайтын, алаңдайтын және сенім көрсететін бірден-бір жандар. Ал теміржол саласында зейін қойып жұмыс істеп, денсаулық пен қауіпсіздікті сақтауда үйдегі жылулық пен әйел адамның қолдауына ештеңе жетпейді. Демек, үй ішінің берекесін кіргізіп, күйеуінің бар жағдайын жасап отырған әйел заты болмаса, ол жайт тікелей өндірістік көрсеткіштерге де теріс ықпал етеді, – деді депоның өндірістік нұсқаушысы, ТЧЭ-24 кәсіподақ ұйымының төрағасы Серік Дүйсенбаев.
Басқосу барысында айтылғандай, қауіпсіздік тек жұмыс орнынан емес, үйден басталады. Отбасындағы ахуал қызмет барысында көрініс табатыны ғылыми тұрғыда дәлелденген. Ендеше от басы, ошақ қасындағы көрсетілген қолдау – теміржол саласындағы қауіпсіздікке қосылған елеулі үлес деген сөз.
Сонымен қатар әсерлі кездесу барысында үздік қызмет атқарып жүрген бірқатар машинистер мен машинист көмекшілері, нарядшылардың жұбайлары арнайы Алғыс хатпен марапатталды. Барша әйелдер қауымына депо басшылығы тарапынан мерекелік гүл шоқтары табыс етілді.
Ал іс-шараның соңында әйелдер құрметіне ақ дастархан жайылып, өзара еркін әңгіме өрбіді.