Теміржолшылар коалиция мүшелерімен кездесті
Абай облысы бойынша меншікті тілші
Семейлік теміржолшылар алдағы республикалық референдумға орай елдік мүдде жолында үн қосуда. Жуырда бөлімшеде «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өңірдегі мүшелерімен кездесу өтті.
«ҚТЖ-ҰК» АҚ Семей филиалының директоры Алмас Сейсемқановтың төрағалығымен өткен басқосу барысында әуелгі кезекте бөлімше кәсіподағының және Семей теміржолындағы «Amanat» бастауыш партия ұйымының төрайымы Айгүл Берікболова сөз алып, жаңа Конституция жобасы жайлы баяндама жасады.
Әрі қарай сөз алған өңірлік коалиция мүшелері жаңартылған Конституция әділдік пен ашықтық қағидаттарын нығайтатынын атап өтіп, Заңның негізгі бағыттары, енгізілетін саяси және әлеуметтік-құқықтық өзгерістер жайын кеңінен түсіндірді. Сонымен қатар кездесу барысында жаңа құжаттың басты басымдылығы – адам құқықтары мен бостандықтары екені де атап өтілді.
Мұнымен қоса қолданыстағы Заңның 33-бабына сәйкес азаматтардың мемлекет ісін басқаруға тікелей қатысуға құқығы бар екені, ал референдум осы құқықты жүзеге асырудың маңызды тетігі екені ерекше атап өтілді.
Спикерлер өз сөздерінде жаңа Конституцияның басты мақсаты – әлеуметтік әділеттілікті нығайту, заң үстемдігін күшейту және адами капиталды дамыту екенін жеткізе келе, референдум барысында әр азаматтың дауысы ел болашағын айқындайтын маңызды шешімге әсер ететіні, сондықтан белсенді азаматтық ұстаным баршаға ортақ жауапкершілік екені де баса айтылды.
Теміржол саласының өкілдері өңірлік коалиция мүшелеріне сауалдарын жолдай алды. Жиын соңында сөз алған бөлімше басшысы Алмас Ғылымұлы барша әріптестерін ел өміріндегі аса маңызды шарада белсенділік танытуға шақырды.