Қызылорда жол дистанциясында күрделі жөндеу басталды
Қызылорда облысы бойынша меншікті тілші
Күн жылынып, көктем лебі ескеннен Қызылорда жол дистанциясында қарбалас жұмыс қарқын алды. Жолшылар биыл пойыздардың қозғалыс қауіпсіздігін сақтауды арттыру мақсатында 33 шақырым жолды күрделі жөндеуден өткізеді.
Дистанция бастығы Марат Оңалов жол жөндеу жұмыстарына ауыр жол машиналары жұмылдырып жатқанын жеткізді.
– Биыл біздің дистанция бойынша арнайы ауыр жол машиналарын (RM, DM, DGS, PBR,) пайдалану арқылы 33 шақырымдық жол аумағы күрделі жөндеуден өткізіледі. Қазіргі таңда Жалағаш – Қараиірім телімінде ауыр жол машиналары жұмысқа жегіліп, жұмыстары жоспар бойынша атқарылып жатыр, – дейді Марат Оңалов.
Күрделі жөндеу жұмыстары кезінде дистанция қызметкерлері темір жолдарды тексеру, шпал мен рельстердің беріктігін, қиыршықты және балласты тас қабатының жөндеу немесе ауыстыру жұмыстарының сапалы орындалуын қамтамасыз етеді. Қызылордалық жолшылар биыл күрделі жөндеу жұмыстарын Жалағаш – Қараиірім, Бөрітескен – Жайылма, Жаңақорған – Жетітөбе телімдеріндегі 22,9 шақырым аумақта және Сауран – Шорнақ телімінде – 10,1 шақырымдық аумақта өткізеді.
Қазіргі таңда дистанция телімдерінде Ақтөбе машиналандырылған жол дистанциясынан РМ, ДМ, ДГС, Unimat ПБР ауыр техникалары, Қырқыншы машиналандырылған жол дистанциясынан ЩОМ, ВПО арнаулы жол машиналары, Луговой РСП-дан ПРСМ ауыр жол машиналары жұмыс жасап жатыр.