Қызылордада күрделі жөндеу жұмыстары қызу жүріп жатыр

Қызылордада жолжөндеу жұмыстары жалғасып жатыр.  Бүгінде Жетітөбе – Бөріойнақ – Аққұм станциялары арасындағы жол арнайы ауыр жол машиналарының көмегімен жөндеуден өткізілуде. Осы телімде 5,5 шақырымдық аумаққа белгіленген жоспардың, қазіргі таңда 1,7 шақырымы орындалды.    

Көктем шығар-шықпас ағымдық күтімі мен күрделі жөндеу шаралары қыза түсетін жолшылар қауымының қазіргі таңдағы жұмысы бекітілген жоспар бойынша жүргізіліп жатыр. Аймақтан өткізілетін жылжымалы құрамдардың қозғалыс қауіпсіздігін сақтауда арттыру үшін, жолдың бабын технологиялық талапқа сай ету үшін наурыз айының басында Қызылорда жол дистанциясының солтүстік телімдерінде жол машиналарының көмегімен күрделі жөндеу басталып, енді дистанцияның оңтүстігіндегі телімдеріне ойысқан.   

Күрделі жөндеу жұмыстарына ПЧМ Ақтөбеден РМ, ДМ, ДГС, ПБР арнайы жол машиналары, ПЧМ Қырқыншыдан ВПО, ШОМ техникасы, Луговойдың Рельс дәнекерлеу пойызы (ПРСМ) жұмылдырылып, әу баста жопарланған 30 шақырымдық аумақтың басым бөлігін, Қараиірім – Жалағаш және Тереңөзек – Қараөзек телімдерінде күрделі жөндеуден өткізіп үлгерді.    

Күрделі жөндеу жұмыстары пойыздардың кестесіне кедергі болмау үшін ыңғайлы уақыттарда, күндіз де, түнгі уақыттарда да жүргізіліп жатыр.

– Наурыз айының 20-нан бастап Қызылорда жол дистанциясының 5-өндірістік теліміне ПЧМ Ақтөбеден РМ-80, ДМ, ДГС, ПБР жол машиналар кешені келіп, жол астындағы балласты тазалау жұмыстарын жүргізіп жатыр. Жөндеу кезінде қиыршық тас төсеу жұмыстарына Қандыағаш дистанциясының ХДВ машинасы да жұмылдырылуда. Жұмыс Жетітөбе – Бөріойнақ – Аққұм станциялары арасындағы жалғыз жолды аралықта жүріп жатыр. Бүгінгі таңда дистанцияның жауапты мамандарының бақылауымен 5,5 шақырымдық аумақты жөндеуден өткізу жоспарының 1,7 шақырымы технологиялық талапқа сай жөндеуден өтті. Жұмыс басында Қызылорда жол дистанциясы директорының орынбасары Қайыржан Төлегенов, 5-телім басшысы Бекболат Зареров бастаған жол шеберлері мен жол жөндеушілер бар, дистанция басшылығы жөндеу жұмыстарының сапалы өткізілуін бақылауда, – деді Қызылорда жол дистанциясының бас инженері Ахметқали Елеусінов.

Жөндеу жұмыстарын 5 сәуірге дейін бітіру жопарланған. Әзірге күніне 4 сағаттық толаскез беріліп, әр толаскез сайын 200 метрлік аумаққа жөндеу жұмыстары жасалып жатыр.