Наурыз айы туғанда...
Қызылорда облысы бойынша меншікті тілші
Наурыз мерекесін Сыр бойының теміржолшылары кең көлемде, ерекше атап өтті. Бұл күні ұлттық құндылықтар дәріптеліп, спорттық ойындар ұйымдастырып, үздіктер марапатталды.
Наурыз тойы өнерпаздардың сахналық қойылымымен басталып, дәстүрлік ойындарға ұлысты. Бөлімше маңындағы алаңда Қызылорда ЖТ бөлімшесі директорының м.а. Мейрамбек Шолтабаев, бас инженер Күлхан Белкібаев, «Қазтеміржолкәсіп» ҚБ филиалы төрағасы Бауыржан Ахметов, Аймақтық ардагерлер кеңесінің төрағасы Марат Шайжан, тағы басқалар сөз алып, көпшілікті ұлыстың ұлы күнімен құттықтады. Марапатсыз мереке мереке ме?! «ҚТЖ-ЖТ» Қызылорда агенттік пунктінің жүк және багажды қабылдап-тапсырушылары Жарас Утебалиев, Белкөл станциясынан Айнұр Иярова, Қызылорда локомотив пайдалану депосының тепловоз машинисінің көмекшісі Талғат Миржанов бөлімше басшылығының алғыс хатымен марапатталды.
Наурыз – ұлттық рухтың жаңғыратын шағы. «Ұлттық ойын – халық мұрасы» атты спорттық шара өтіп, бөлімшенің спорт секторы Бақытжан Имбергенов, кәсіподақ ұйымының жаңа төрайымы Ғалия Қожахметова жүлдегерлерге бағалы сыйлық табыстады. Мерекеде ерекше нақышта ұлттық киім киген теміржолшыларға да арнайы сый-сияпат жасалды. Наурызкөжеден дәм татқан теміржолшылар изгі тілектерін айтып, бір-бірін құттықтап жатты...
– Жалпы, биылғы Наурыз теміржолшылар үшін халықтық сипатта өтті. Айдың 13-нен бастап тораптық станциялардағы салалық мекемелердің кәсіподақ ұйымы жетекшілері мен филиал қызметкерлерінің ұйымдастыруымен түрлі шаралар өткізіліп, ұжымдық ынтымақтың беки түсуіне ықпал етті. Шиелі, Сексеуіл тораптық бекеттеріндегі теміржорлшылар мен Қазалыдағы жол, белгі беру, электрмен жабдықтау дистанцияларында өткізілген наурыз күнделігі ұлағатты істермен, тағылымдық әсерімен көпшіліктің жүрегіне жылылық ұялатты, көрермендердің қызу қолдауына ие болды, – дейді «Қазтеміржолкәсіп» ҚБ Қызылорда филилалы төрағасы Бауыржан Ахметов.
