Донор бол – өмір сыйла!
Қызылорда облысы бойынша меншікті тілші
Қызылордалық теміржолшылар ерікті түрде «Донор бол – өмір сыйла!» қайырымдылық қан тапсыру акциясына қатысты. Теміржолшылардың бұл жолғы қайырымдылық әрекеті құзырлы органның өтінішіне орай әрі Рамазан айында жасалған ғибратты іс болды.
Қызылорда магистральдық желі бөлімшесінің қызметкерлері қан тапсыру акциясына белсене атсалысты. Өйткені олар өз қандары жазатайым оқиғалардан зардап шегіп жарақат алғандарға, дүниеге жаңа келген нәрестелер мен жас аналарға, қатерлі ісік пен ауыр сырқатқа шалдыққан мұқтаж адамдарға ауадай қажет екенін жақсы біледі. Сондықтан «Бір тамшы қан – жанға араша» деген ұстаныммен көмекке асыққан теміржолшылар алдымен қан сараптамасын жасатып, оның нәтижесі анықталған бойда жарамды қан иелері анықталып, қан тапсыру орындықтарына жайғасып жатты. Барлық процесс қан орталығы дәрігерлерінің қатаң бақылауымен атқарылды.
– Орталық дәрігерлері бөлімше қызметкерлері арасынан 20-дан астам теміржолшыны таңдап алып, көшпелі жағдайда қан қабылдап алды. «Облыстық қан орталығы» басшысы Ж.Үсенов Ербол Сәулебеков басқаратын бөлімше ұжымына алғыс айтты, – дейді кадр бөлімінің басшысы Аида Каналиева.